المشهد الأول
تدخل سيدة 1 مع ابنها يساعدها ف الترتيب وتدخل بعدهم سيدة 2
سيدة ١ لابنها : ايوة كده حبيبي برافو عليك ..شكرا عشان بتساعدني
سيدة ٢ : يا بختك بابنك دايما باشوفه بيساعدك في كل حاجة .ولد جميل ومطيع وبيحب يساعد غيره
سيدة ١ : عارفة لولا الملك سليمان ماكناش هنعيش الفرحة دي
سيدة ٢ باستغراب: الملك سليمان؟! ازاي بقى !
سيدة ١ : هاحكيلك ( تنزل السيدتين والولد ويطلع الملك )
المشهد الثاني :
سليمان نايم ويسمع صوت ربنا
صوت الرب: سليمان ... اطلب مني إللي انت عايزه
الملك سليمان : يارب انت عملت حاجات كتير وأمور عظيمة مع أبويا الملك داود طول وقت حكمه وخليتني ابقى الملك بعده ..بس أنا ..أنا صغير في السن ومعنديش خبرة والشعب كتير جدا مش عارف أحكمه ازاي
عشان كده يارب أنا عايزك تديني حكمة وقلب يعرف يميز بين الخير والشر عشان أقدر أحكم بين الناس
صوت الرب: طلبك جميل يا سليمان ..عشان انت طلبت الحكمة والفهم وماطلبتش لنفسك غنى وفلوس أو إنك تعيش سنين كتير ولا طلبت انتصار على أعدائك فانا هاديلك الحكمة إللي انت طلبتها مش هيكون فيه ملك أحكم منك
وكمان هاديك إللي انت ماطلبتوش..هاديك غنى وكرامة ولو سمعت كلامي ونفذت وصاياي هاديلك عمر طويل كمان
سليمان ( يصحى ) معقول ! معقول إللي شوفته وسمعته ده ؟! ده كان حلم وربنا كلمني في الحلم
المشهد الثالث :
تدخل سيدة ١ مع سيدة ٣ ومعاهن بيبي وبيتخانقوا ف الممر بصوت عالي
سيدة ١ : بتبكي بأقولك ده ابني انا
سيدة ٣ : لا ده ابني أنا ..اتي كدابة
يدخل حارس الملك
حارس الملك :بيزعق بس بس ايه الدوشة دي ! وصوتكم عالي كده ليه انتي
سيدة ١: ده ابني انا وهي بتقول انه ابنها هي
سيدة ٣ : ايوة ده ابني انا ..هاتيه باقولك
حارس الملك : لازم ابلغ جلالة الملك سليمان وهو يتصرف
جلالة الملك سليمان .. فيه ستين بره بيتخانقوا على طفل وكل واحدة بتقول ده ابني .. ومحدش عارف مين فيهم على حق
الملك سليمان: ( بحزم ) دخلهم هنا حالا
صوتكم عالي ليه وبتتخانقو على ايه ؟!
سيدة ١ : هاحكي لحضرتك يا جلالة الملك
أنا والست دي عايشين في بيت واحد وكنا حامل في نفس الوقت وأنا ولدت وهي ولدت بعدي ب ٣ أيام بس في نص الليل ابنها مات راحت حطت ابنها الميت جنبي واخدت ابني من جنبي حطيته جنبها ..صحيت بصيت في وشه لقيته مش ابني
سيدة ٣ : لا يا جلالة الملك الكلام ده كله كذب .ابنها هي مات وده ابني انا
سيدة ١ : بتبكي لا ماتصدقهاش ..ده ابني انا ابني انا
الملك سليمان : خلاااااااص مش عايز صوت
يا حااارس ..اديني سيف بسرعة
(الحارس يديله السيف )
هنقسم الطفل ظه نصين وكل واحدة فيكم هتاخد نص
سيدة ٣ : أيوة جلالتك اقسمه نصين وكل واحدة تاخد نص
سيدة ١ : بتبكي جااامد لا لا لا يا جلالة الملك ..ادوها الطفل
هو اه ابني بس انا مش عايزاه يموت
الملك سليمان : يشاور على سيدة ١ : ادوها الطفل ..بلاش تقسموه نصين لأن دي فعلا أمه الحقيقية
( ينزل الكل )
المشهد الرابع :
سيدة ١ تطلع ومعاها الولد اللي طلع في الأول وتطلع سيدة ٢
سيدة ١ : عرفتي ليه قولتلك لولا الملك سليمان ماكناش هنعيش الفرحة دي
سيدة ٢ : أنا طول الوقت باسمع القصة دي ناس كتير بتفضل تتكلم عن حكمة الملك سليمان بس كنت فاكرة دي قصة متألفة ومش حقيقية عشان يجاملوا الملك وكده
سيدة ١: لا طبعا دي قصة حقيقية والدليل إني أنا الأم إللي ابنها كان هيتقسم نصين بس بفضل حكمة الملك سليمان إللي ربنا اداهاله ابني أهو عايش معايا ( تحضن الولد