الشخصيات (ماما - جدو – مشمش – لوزة)
المشهد الأول
ماما بتظهر لوحدها وهي بتنظم البيت
مشمش: ياماما، يالوزة يا كل الناس أنا خلصت امتحانات وأخيراً الأجازة جت هيه هيه أنا مش مصدق نفسي
لوزة: ايه الدوشة اللي انت عاملها دي يامشمش؟ عرفنا ياسيدي إنك خلصت الامتحانات وأخدت الأجازة مبروك الف مبروك. (بتريقة)
ماما: الف مبروك يامشمش الف مبروك ياحبيبي الحمدلله الأجازة جت كنت مستنيها من بدري (هههههه)
مشمش: ايوه ياماما فعلاً أنا مستني الأجازة من بدري أوووووي، مافيش بقى ذاكر يامشمش ذاكر ياحبيبي ها ياماما ...فهماني طبعاً.
ماما: ماشي يااستاذ مشمش مش هاقولك ذاكر بس هاقولك على حاجات تانية تعملها.
مشمش: نعم نعم ياماما حاجات؟! حاجات تانية ايه ان شاء الله؟!
ماما: حاجات مفيدة تعملها في وقت الأجازة زي إنك تاخد كورسات أو تتعلم حاجة مفيدة وتقدر تستفاد بيها.
لوزة: لأ لأ ياماما في دي مش معاكي حق خالص الاجازة يعني انتخه ياماما معروفة دي بقى.
مشمش: هو ده الكلام يالوزة أخيراً قولتي حاجة صح
لوزة: ياسلام يااستاذ مشمش انا دايماً باقول الكلام الصح انت بس اللي مش واخد بالك.
مشمش: طبعاً .. طبعاً (بتريقة)
ماما: مش صح يالوزة اللي بتقوليه الأجازة مش يعني الأنتخه زي مابتقولي ..الأجازة يعني نتعلم حاجات مفيدة نقدر نستفيد بيها علشان الوقت مايضيعش مننا ع الفاضي.
مشمش بصوت هادي: نتعلم مش كفاية تعليم ياماما.
ماما: بتقول حاجة يامشمش؟
مشمش: ابداً.. أبداً أنا أقدر برضو.
ماما: ماشي يااستاذ مشمش انا عارفة مش هاخلص من لماضتك دي.
يالا اجهزوا بسرعة علشان هانروح لجدو
مشمش ولوزة (هيه.. هيه هانروح لجدو هيه .. هيه)
المشهد الثاني
تنزل كل العرايس من على المسرح ويظهر جدو على المسرح ويسمع جرس الباب بيرن (تن تن .. تن تن)
جدو: حاضر.. حاضر أنا جاي أهو (ويفتح الباب) أهلاً أهلاً ياحبايبي عاملين إيه وحشتوني جداً جداً جداً.
مشمش ولوزة: وانت كمان ياجدو وحشتنا جداً جداً جداً
جدو: ههههه حبايبي حبايبي
طمني يامشمش خلصت الامتحانات بتاعتك ياحبيبي؟
مشمش: ايوه ياجدو أخيرااااااً خلصت واخدت الأجاااااازة وهاعمل اللي انا عاوزه من غير ما ماما تفضل تقوللي قوم يامشمش ذاكر يامشمش بطل تضيع وقتك يامشمش (بيقولها وهو متضايق)
جدو:- وماله يامشمش لما ماما تكون خايفة عليك وتقولك ذاكر علشان الوقت مايضيعش منك ويسرقك
وبعدين تعالى هنا.. مين قالك انك علشان اخدت الأجازة تكون بتعمل حاجات وخلاص وتضيع وقتك بيها وماتستفدش بوقتك الجميل اللي ربنا ادهولك.
مشمش: ياجدو ياجدو حضرتك كمان هاتقوللي زي ماما.
جدو: ماما قلبها عليك وبتحبك انت ولوزة يامشمش ونفسها تكونوا أحسن ناس في الدنيا ولا إيه يامشمش عندك شك في كده؟
مشمش:- ابداً ياجدو انا عارف ومتأكد ان ماما بتحبني وخايفة على مصلحتي ونفسها انا ولوزة نكون احلى ناس في الدنيا.
جدو: فعلاً يامشمش عندك حق ياحبيبي ... وعاوز اقولك على حاجة مهمة
مشمش: استنى بس ياجدو قبل ماتقول الحاجة المهمة حضرتك قولت حاجة من شوية وانا مش فاهمها
جدو: اتفضل ياحبيبي ايه هي الحاجة دي ؟
مشمش: كنت بتقول ياجدو ان الوقت يضيع مني ويسرقني يعني ايه؟ هو الوقت حرامي؟
جدو: ههههه ههههه لأ لأ مش ده المقصود من كلامي يامشمش... بص ياحبيبي الوقت يسرقني يعني انه اكون باستخدم الوقت في حاجات مش مفيدة وتكون بتخليني مااستفادش من الوقت الغالي اللي ربنا ادهولي في حاجات مش مفيدة زي مثلا قعادي قدام التلفزيون والموبايل بالساعات وساعة ورا ساعة وتلاقي الوقت بيجري بسرعة من غير ماتستفاد منه وتعمل حاجات مفيدة.
تعرف يامشمش ان الوقت اللي ربنا ادهولك ده وزنة او يعني حاجة مهمة ربنا بيأتمنك عليها وهاييجي في يوم يسألك ياترى عملت إيه بالوقت اللي اديتولك ده ياترى استفدت بيه في حياتك ولا ضيعته وماعملتش بيه حاجة.
مشمش:- معقوله ياجدو الكلام ده؟! ..انا عارف مثل الوزنات كويس اللي اخدناه في مدارس الاحد بس ماكنتش عارف ان الوقت هو كمان وزنة.
جدو: تعرف يامشمش عاوز اقولك على حاجة مهمة ممكن ماتكونش عارفها دايماً الشيطان بيحاول انه يسرق منك الوقت علشان ماتعملش حاجات مفيدة بيه.
والوقت اللي ربنا ادهولك وبيعدي عليك وانت مش بتنمي وتكبر موهبة الله ادهالك اوانك تفضل ماسك الموبايل أو تقعد قدام التليفزيون بالساعات كده انت مش بتبقى أمين في الوقت اللي ربنا ادهولك كل حاجة ربنا ادهالك يامشمش هي وزنة وهايسألك عليها ويقوللك عملت ايه باللي اديتهولك وياترى استفدت بيه ولا ضيعته من غير ماتعمل بيه حاجة مفيدة.
مشمش: أنا فعلاً ياجدو ماكنتش اعرف كل ده
جدو: تعالى احكيلك قصة حلوة
كان فيه ف مرة اتنين بيلعبوا في مسابقة جري وكان فيه واحد سريع ودايماً بيفوز وواحد تاني بطئ ومش بيكسب وطبعاً علشان البطئ كان نفسه يكسب فقرر إنه يشغل دماغة شوية بطريق غلط وبدل مايتدرب ويتعب علشان يكسب قرر إنه يغش حاجة شريرة ويعمل عملات معدنية لونها دهبي ويرميها وهو بيجري في السباق واللعيب الشاطر للأسف اخد باله انه فيه عملات معدنية بتلمع بتقع في الأرض ولفتت نظره وافتكرها انها عملات دهب وبدل مايكمل السباق بتاعه ويركز فيه علشان يكسب قرر إنه يجمع العملات دي وللأسف خسر في السباق.
مشمش: يااااااه ليه بس عمل كده ده بيكسب على طول وشاطر كان هايكسب السباق لولا اللي اللاعب التاني عمله وضحك عليه ...ياخسااااارة
جدو:- ماتلومهوش يامشمش .. احنا كمان الشيطان اوقات بيضحك علينا ويخلينا نضيع الوقت بتاعنا ويفكرنا اننا بنفوز بالحاجات اللي بنضيع فيها وقتنا لكن في الحقيقة هو اللي بيضحك علينا.
مشمش: فعلا ياجدو انا اوقات كتير كنت فاكر اني لما افضل العب على الكمبيوتر او الموبايل او اتفرج على التلفزيون طول النهار اني كده هاكون باعمل حاجة مفيدة لكن للأسف مش هو ده المكسب لكن المكسب الحقيقي اني انظم وقتي وممكن اعمل حاجات كتيرة جداً مفيدة بدل ما أضيعه واكون فاكر ان هو ده الصح.
جدو:- تعرف يامشمش فيه آيه حلوة جداً في رسالة بولس لأهل أفسس إصحاح 5 والآيه 15 & 16 واللي بتقول “فانظروا كيف تسلكون بالتدقيق، لا كجهلاء بل كحكماء مفتدين الوقت، لأن الأيام شريرة”
ودي معناها اننا نركز ازاي نقضي وقتنا ونكون بنستخدمه صح
مشمش: شكراً ياجدو لأنك قولتي على حاجات مفيدة جداً النهاردة كنت أول مرة أسمعها واتعلمها أنا باحبك أوي ياجدو يا أحلى جدو ف الدنيا.
جدو: وانا كمان باحبك يا أحلى مشمش في الدنيا. وتعالى بقى نسمع مع أصحابنا الحلوين اللي كانوا حاضرين معانا النهاردة الترنيمة الجميلة دي اللي بتقول وقتي ثمين وده ملك الرب....يالا بينا يااصحابنا نسمعها ونتعلمها مع بعض
إيفون رزق
جمعية خلاص النفوس بحلوان
©www.madareselahad.org