الشخصيات: أماني (الأم)، رامز، طنط هالة.
تظهر الأم ورامز فى البيت ثم يرن الجرس وتدخل طنط هالة وتسلم على الأم ورامز.
طنط هالة : مساء الخير يا أمانى عاملة إيه؟ وحشتينى جداااااا
أماني : مساء الخير ياهالة إنتى كمان وحشانى خالص عاملة إيه ؟وكل أولادك كلهم حلوين يارب تكونوا بخير.
طنط هالة : الحمد لله ياأمانى إنتى اللى عاملة إيه وصحتك وأولادك.
أمانى : تمام ياهالة كله كويس نشكر ربنا.
طنط هالة : دايمًا يا أمانى كلامك قليل هههههههه.
أمانى : هاعمل إيه بس علشان ماكنش رغاية واصدع الناس ههههه.... تشربى إيه ياهالة ؟
طنط هالة : علطول كده... ماشى يا أمانى أممم ممكن أشرب شاى.
أمانى : حاضر من عينى ثوانى وهاعملك أحلى كوباية شاى.
تخرج أمانى وتكون طنط هالة ورامز موجودين مع بعض.
طنط هالة : ازيك يا رامز ...عامل إيه ياحبيبى وعامل إيه مع بابا وماما.
رامز : الحمد لله ياطنط كله تمام.
طنط هالة : الحمد لله ياحبيبى... دا أنا كلمتكم إمبارح فى التليفون بس ماحدش رد على هو إنتم خرجتم ولا كنتم فين ؟
رامز : آه ياطنط أصل إحنا روحنا نشترى طلبات البيت وإشترينا حاجات كثيرة أوى بس كنت عاوز أشترى حاجة حلوة وأروح الملاهى وبابا مارضيش قاللى الفلوس مش هاتقضى.
طنط هالة : ياه الفلوس مش هاتقضى ليه هو بابا بياخد فلوس كام من الشغل ؟
رامز : مش عارف ياطنط ده معاه فلوس كثير أوى ده إحنا هانجيب شقة جديدة وعربية.
طنط هالة : (بإستغراب ) شقة وعربية ! طيب وبعدين إيه اللى حصل ؟
رامز : مافيش بابا وماما بقى وإحنا رايحين السوبر ماركت كانوا قاعدين يتخانقوا وصوتهم عالى علشان ...
تدخل أمانى وأول مارامز يشوفها يقول...
رامز : طيب أنا هاروح أدخل أوضتى بقى ياطنط هالة سلام.
أمانى : يا رامز تعالى ياحبيبى.
طنط هالة : هو كان بيحكى معايا بس.
أمانى : (فى سرها) بيحكى! طيب ربنا يستر.
طنط هالة : (بعد ماتشرب الشاى) طيب أنا هاقوم بقى أشوف اللى ورايا أصل هاروح لواحدة صحبتى تانى علشان أزورها ... شكرًا يا أمانى... سلام.
أمانى : سلام يا هالة ربنا معاكى.
تخرج طنط هالة وتروح أمانى لغرفة رامز
أمانى : ها يارامز إيه الأخبار؟
رامز : (تمام ياماما) بصوت يقول إنه عامل حاجة غلط.
أمانى : عاوز تقوللى على حاجة يارامز ؟
رامز : الصراحة آه ياماما.
أمانى : طيب يالا أحكيلى أنا سامعاك.
رامز : مافيش ياماما طنط هالة لما روحتى تعملى الشاى سألتنى إنتم روحتم فى حتة إمبارح علشان كلمتنا ومحدش رد عليها فقولت لها إننا روحنا السوبر ماركت علشان نشترى طلبات البيت وإنى كنت عاوز أشترى حاجة حلوة وألعب فى الملاهى وبابا قال إن الفلوس خلصت وإننا هانجيب عربية وشقة جديدة وبعدين قولت لها على إنكم إتخانقتم إنتى وبابا مع بعض... بس كده.
أمانى : بس كده إنت كنت ناوى تقول إيه كمان ؟!!!
بص يارامز كل بيت ياحبيى بيحصل جواه كلام بين الناس اللى ساكنين جواه الكلام ده لازم لازم يكون سر بينهم هما وبس... يعنى ماينفعش أى حد من بره البيت يعرف السر ده... أنت تعرف يعنى إيه سر ؟
رامز : آه ياماما يعنى كلام بنقوله وماينفعش أى حد يعرفه.
أمانى : برافو عليك يارامز فعلا زى ماقولت بالضبط كل بيت يكون ليه أسرار ماينفعش أى حد مش من بيتنا يجى يسألنا على أى حاجة بتحصل فى بيتنا ونقولها له.
رامز : حتى تيتة جدو وخالو وخالتو وعمتو وعمو وكل قرايبنا ؟!!!!
أمانى : آه ياحبيبى حتى كل قرايبنا تعرف ليه يارامز ؟ علشان إحنا لما بنقول أسرار بيتنا لحد بنكون كأننا قاعدين فى مكان إزاز شفاف وكل الناس شايفة إحنا بنعمل إيه ياترى ده ينفع يارامز ؟
رامز : لأ ياماما إنتى فعلًا عندك حق دى حاجة وحشة أوى إننا نكون بنقول أسرار بيتنا لكل الناس أوعدك ياماما إنى عرفت غلطتى ومش هاعمل كده تانى أنا آسف.
أمانى : برافوا عليك يارامز أوقات بنغلط لكن المهم إننا مانكررش الغلط بتاعنا.
إنتم كمان يا أصحابى لازم نتعلم إننا لازم أسرار بيتنا والكلام اللى بيحصل جواه يكون فى بيتنا وبس ومش أى حد نعرفه نقوله على الكلام ده.
باى باى يا أصحابى نشوفكم مرة تانية ونتعلم حاجات جديدة مع بعض.
تأليف:إيفون رزق
©www.madareselahad.org