ترمس: كل سنة وانتوا طيبين ... عاملين ايه كويسين؟ مبسوطين؟

          أنا كمان مبسوط إني معاكو إنهاردة ... وسمعت انكم عندكم حفلةانهاردة ... أصل أنا باحب الحفلات أوي أوي أوي.

(تظهر ترمسة)

ترمسة: أنا سامعة كلمة حفلة ، هيه هيه أنا بأحب الحفلات أوي

ترمس: (بغضب) إيه ده إنتي جيتي ليه؟ مين قاللك على الحفلة؟

ترمسة: أصحابي ... أصلهم عارفين إني بأحب الحفلات أوي وهما اللي قالولي تعالي ... مش كده ياأصحابي؟

ترمس: أنا بقى لو كنت أعرف إنك جاية مكنتش جيت خالص

ترمسة: ليه يا ترمس هو إنت لسه زعلان مني ، ماأنا قلتلك أنا أسفة خلاص إنت لسه فاكر؟؟

ترمس: بصي يا ترمسة أنا كل مافتكر الموضوع ده باتضايق جداً ... خلاص بقى عشان أنا مش عايز أفتكر!

ترمسة: يـــــــوووووه يعني أنا أعمل إيه ، أنا إعتذرتلك ومش عارفة أعمل إيه تاني إهئ إهئ

           أنا هاروح أقول لعمو حكاكيو وهو يجي يصالحنا على بعض .

(تذهب ترمسة لتنادي على عمو حكاكيو)

ترمسة: ياللا ياعمو بسرعة خليك نشيط كده

عمو حكاكيو: بشويش عليا يا ترمسة أنا بقيت كبير في السن وعلى العموم أديني وصلت ... في إيه ياستي؟؟؟

                  إزيكم يا أصحابي الصغيرين كل سنة وأنت طيبين وبالرب يسوع فرحانين ومبسوطين.

                 إزيك ياترمس ياحبيبي ... اتبسطت في العيد؟؟؟

ترمس: لا ياعمو ولا اتبسطت ولا حاجة

عمو حكاكيو:ليه بس يا حبيبي ؟؟ إيه اللي حصل؟

ترمسة: إحم إحم أقولك أنا يا عمو

ترمس: لأ ماتقوليش أنا اللي هاقول ... شوف يا عمو ...

           أنا قبل العيد كنت محوش من المصروف بتاعي عشان أشتري علبة ألوان فلوماستر وفعلاً إشتريتها وسيبتها في البيت ونزلت ألعب مع أصحابي ... رجعت                 لقيت العلبة مفتوحة والألوان فاضية

           (مع انها لسه جديدة) إتخضيت ورحت سألت ماما قالتلي إسأل ترمسةولما سألت ترمسة قالتلي أنا اللي عملت كده .

عمو حكاكيو: ليه كده ياترمسة ياحبيبتي ؟ تلعبي في حاجة أخوكي من غير إستئذان وكمان تبوظيها.

ترمسة: ياعمو أنا أفهم حضرتك ...بصراحة عجبني شكل الألوان وحبيت أعرف الألوان بتيجي منين في القلم فقلت أفتحه وأشوف راحت الأنبوبة طلعت ولقيت الألوان كتيرة في الأنبوبة فقلت أجرب باقي الألوان راحت الألوان خلصت بس... لقيت ترمس إتضايق خالص ورحت إعتذرت له وإتأسفت له وطلبت منه إنه يساحني عشان أنا فعلاً غلطانة.

عمو حكاكيو: لا لا لا كده ياترمس إنت غلطان وهي كمان غلطانة

ترمس: طب هي غلطانة عشان لعبت في حاجاتي من غير إستئذان وكمان بوظتها أنا غلطان في إيه بقى؟؟؟

عمو حكاكيو: لأنها إعتذرت لك وقالتلك سامحني وإنت لسه زعلان ومش  راضي تسامحها .., إنتوا عارفين الحكاية دي يا أولاد فكرتني بإيه؟

ترمس وترمسة: بإيه يا عمو؟

عمو حكاكيو:لما كان الرب يسوع على الأرض جاله بطرس وقال له يارب يارب كام مرة يغلط فيا أخويا وأنا أسامحه؟؟ هل لسبع مرات؟ عارفين الرب يسوع قال له إيه... مش سبع مرات بس لسبعين مرة سبع مرات وشبه لهم الموضوع ده بحكاية حلوة تعالوا نسمعها...

( ينزل ترمس وترمسة)

عمو حكاكيو: كان فيه راجل عنده خدامين كتار وفي يوم ابتدى يحاسب كا واحد فيهم ونادي على واحد منهم

(ينزل عمو حكاكيو ويظهر السيد وخدام1)

السيد: إنت مديون لي بعشرة آلاف جنيه ... فين الفلوس بتاعتي؟؟؟

خدام1 : بس أنا مش معايا أدفع

السيد: خلاص يبقى تتباع إنت ومراتك وولادك وكل إللي عندك وتدفع اللي عليك!

خدام1 : لا ياسيدي عشان خاطري أصبر عليا شويه وأنا هاسدد كل الفلوس إللي عليا.

السيد: خلاص أنا مسامحك

(ينزل السيد والخدام1 ويظهر عمو حكاكيو)

عمو حكاكيو: وفعلاً ياولاد سامحه ومشي الخدام وراح قابل واحد زميله بيشتغل معاه كان مديون له ب 100 جنيه

خدام1: تعال هنا سدد لي ال 100 جنيه اللي ليا عندك

خدام2: عشان خاطري اصبر عليا لحد مااسدد اللي عليا

خدام1: ماليش دعوة ... دي مش مشكلتي أنا هاوديك السجن لحد ماتسدد إللي عليك

(ينزل خدام1 و2 ويظهر عمو حكاكيو مع ترمس وترمسة)

عمو حكاكيو: وراح زميله السجن لأن الخدام إللي سيده سامحه في الكثير مارضيش يسامح أخوه في القليل ... أصححاب الخدام لما شافوا كده وإزاي زميلهم دخل السجن راحوا قالوا لسيدهم كم إللي حصل راح السيد نادى الخدام إللي سامحه وقالله إنت شرير لأني سامحتك في فلوس كتير ، إنت كمان مش كان المفروض ترحم زميلك زي مانا رحمتك؟؟ وزعل منه سيده وخلاه يروح السجن لحد مايسدد كل إللي عليه. وقال الرب يسوع لتلاميذه إنتوا لازم تسامحوا إخواتكم وتغفروا لهموبعدين مش إحنا في الصلاة الربانية بنصلي ونقول وأغفر لنا ذنوبنا كما نغفر نحن أيضاً للمذنبين إلينا.

الرب يسوع بيعلمنا إنه إحنا مش بس نغفر لإخواتنا لكن كمان لأعداءنا ، والرب يسوع نفسه على الصليب صلّى وقال " يا أبتاه إغفر لهم لأنهم لا يعلمون ماذا يفعلون" كان بيصلي من أجل الناس اللي صلبوه.

ترمس: فعلاً يا عمو حكاكيو أنا عرفت دلوقتي أنا غلطت في إيه ... زي ماالرب يسوع سامحني على خطيتي وغفرهالي لما أنا طلبت منه إنه يجي ويسكن في قلبي أنا كمان المفروض أسامح أختي زي ماهو سامحني. خلاص يا ترمسة أنا مسامحك ومش زعلان منك.

ترمسة:وأنا ياترمس أوعدك إني مش هازعلك تاني ولا هاعمل حاجة تضايقك!

عمو حكاكيو: وإنتوا يا أصحابنا أنا هاسيب معاكوا الآية الحلوة دي ياريت  تحفظوها وتعملوا بيها ... الآية بتقول:

"كونوا لطفاء بعضكم نحو بعض شفوقين متسامحين كما سامحكم الله أيضا في المسيح."  أفسس 4 : 32

© www.madareselahad.org