الشخصيات : كوكو – ماما – نورا – سارة – ميكي
المشهد الأول : في المدرسة
يدخل كوكو مبسوط جدا ومعه كرة
كوكو: يا فرحتي ! أنا مفيش حد قدي انهاردة ... أخيرا ماما اشترتلي الكرة إللي كان نفسي فيها من زمان ... كل أصحابي عندهم واحدة بس محدش عنده اللون ده .
أنا متأكد إنهم لما يشوفوها هيقولوا يا ريت كان عندنا كرة زي بتاعت كوكو.
(نورا وسارة وميكي واقفين مع بعض)
نورا : عملت واجب العربي ولا لا يا أستاذ ميكي ؟
ميكي: هو أنا أقدر أنسى أعمله تاني ... ده مدرس العربي عليه عقاب محترم !
سارة: ده أنت كان عليك منظر يا ميكي وإنت واقف في أخر الفصل متعاقب هاهاها
مقدرتش أمسك نفسي من الضحك بصراحة
ميكي: يا ظريفة يا ست سارة!
يدخل كوكو
كوكو ( بكل فخر ) : ازيكم يا أصحابي ؟
أصحابه: إزيك يا كوكو عامل إيه ؟
كوكو: عامل كرة جديدة شوفتوها ؟؟ قصدي أنا كويس
ميكي: عامل كرة جديدة ؟؟ هاهاها ... إحنا بنسألك عامل إيه؟... حلوة الكرة دي
سارة: بس دي بقيت قديمة ... تقريبا كل الفصل عنده كرة زيها
نورا: يا كوكو كان المفروض تشتري لعبة من اللعب الجديدة
كوكو: (بغضب) يعني إيه ؟ الكرة بتاعتي مش حلوة ؟!!!
ميكي: محدش قال كده بس فيه لعب جديدة طلعت أحلى من الكرة دي بكتييييير
سارة : شفتي يا نورا اللعبة إللي جابتها ساندي في عيد ميلادها ؟
نورا: اسكتي يا سارة أنا بازن على ماما تجيبلي واحدة زيها وقالتلي هاتجيبهالي في العيد إللي جاي.
ميكي: اومال لو شوفتوا العربية إللي بتتقلب وبتبقى انسان آلي ... ده بقى جامدة أوي
(يلاحظ كوكو إنهم اتشغلوا عنه فيذهب بعيدا)
المشهد الثاني : في البيت
يرجع كوكو إلى المنزل باكيا
ماما : مالك يا كوكو ؟
كوكو: ( يرمي الكرة على الأرض ويبدأ في البكاء)
أنا مابحبش الكرة دي ... مش عايزها !
ماما (باستغراب) إيه الكلام ده ! مش دي إللي إنت اخترتها وكان نفسك فيها من زمان !
كوكو : اه قبل ما اعرف أن فيه لعب جديدة بقت في السوق
فيه عربية بتتحول انسان آلي ... وعايزك تجيبيهالي
ماما : إنت عارف يا كوكو إننا مش بنجيب لعب عمال على بطال .. حوش من مصروفك واشتري إللي انت عايزه
كوكو : نعم يا ست ماما ! أحوش ؟
ده أنا كده هاقعد وقت طويل وهتكون فيه لعب جديدة نزلت ... ماليش دعوة أنا عايز لعبة جديدة إهي إهي ماليش دعوة ماليش دعوة
ماما : يعني إيه الكلام ده يا كوكو ؟ إنت من إمتى بتتكلم معايا كده !
كوكو اتفضل ادخل اوضتك وفكر في الكلام إللي إنت قلته ده
كوكو : إهئ إهئ ... مفيش حد بيحبني ... إهئ إهئ
المشهد الثالث : في حجرة كوكو
كوكو في حجرته بيكلم نفسه
كوكو : يا ريتني كنت اتولدت في عيلة غنية وعندهم فلوس كتير .. ماكنش حد قاللي لأ على أي لعبة أنا عايزها
ليه بس يا ربي ماخلتنيش عندي فلوس كتير ؟؟
اااااه أنا تعبان أوي ... وعايز أنام
وينام كوكو ويسمع صوت بيناديله : كوكو يا كوكو
كوكو: مين بينادي ؟ أنا مش شايف حد في الأوضة !
الصوت : بص يا كوكو أنا جنبك
(ينظر كوكو يجد بجانبه مضرب كرة بنج يتكلم معه )
كوكو : إيه !!! مضرب الكرة بيتكلم ! أنا أكيد باحلم
المضرب: فاكرني يا كوكو ؟
كوكو : طبعا فاكرك ... كان نفسي أتعلم لعبة البينج بونج وفي يوم لقيت ماما جايبالي المضرب والكرة وبتقولي أتعلم براحتك
المضرب : بس إنت نسيتني وبطلت تلعب بيا .
كوكو: مانا بقى عندي لعب كتير
(يأتي صوت تاني) طب وأنا يا كوكو
ينظر كوكو ويجد أورج يتكلم
الأورج : فاكرني يا كوكو ؟
كوكو : طبعا فاكراك ... بابا اشتراك وأنا عندي 7 سنين وقعدت أعملهم دوشة في البيت وأنا باعزف عليك
الأورج : بس إنت بطلت تعزف موسيقى
كوكو : يااااه بقالي مدة طويلة ماعزفتش عليك
وأنا كمان يا كوكو
كوكو : إنت مين ؟
الإسكوتر : أنا الإسكوتر ... فاكر لما مامتك اشترتني ؟
كوكو : ده كان يوم ... أنا فاكر ماكنش فيه حد في الفصل عنده واحد زيه
كوكو لنفسه : أنا إزاي نسيت كل الكلام ده ؟ أنا عندي لعب كتير وماما وبابا جابولي حاجات حلوة كتير ... إزاي كنت فاكر إن ماما مش بتحبني بعد كل الحاجات إللي بتعملها معايا دي !!
إزاي أنا عملت كده ؟ عينيا ماشافتش كل الحاجات إللي عندي وبقيت باصص على إللي مش عندي ؟
الميس في مدارس الأحد كانت لسه بتقولنا اد ايه الرب يسوع بيفرح بينا وإحنا بنشكر على كل حاجة حلوة عندنا وإن فيه أولاد وبنات كتير حوالينا ماعندهمش إللي عندنا
إزاي نسيت كلامها ده ؟؟ وإزاي مابقتش فرحان بالكرة إللي كان نفسي فيها من زمان !
كوكو : سامحني يا رب يسوع أنا كنت أناني ومتذمر ماشفتش إللي عندي وبصيت على إللي مش عندي ... أشكرك على كل حاجة حلوة عندي وعلى محبة بابا وماما ليا ... ساعدني دايما أشكر وأكون فرحان ... امين
فجأة يصحى كوكو : أنا عندي كلام كتير أقوله لماما ... يا ماما يا ماما
ماما : فيه إيه يا كوكو ؟
كوكو : سامحيني يا ماما .. أنا غلطت في حقك وقولتل كلام مش مظبوط ... أنا فرحان بيكي وباشكر ربنا عليكي إنتي وبابا وشكرا على كل حاجة إنتي بتعمليها عشاني.
ماما : مسامحاك يا كوكو وباحبك أوي
كوكو : وأنا كمان
المشهد الرابع : في المدرسة
كل الأولاد واقفين مع بعض
ميكي : يا كوكو إنت جبت الكرة بتاعتك انهاردة ؟
كوكو : أيوة ... ليه ؟
ميكي : أصل الكرة بتاعتي باظت ... إيه رأيك نلعب بالكرة بتاعتك إنهاردة ؟
كوكو (بفرح) : طبعا طبعا ... دي حاجة تفرحني.
أ/ سالي أنيس
© www.madareselahad.org