الشخصيات:
ريمون، مارك ،مينا، مارينا، والدة ريمون
المشهد الأول: في المدرسة
ريمون: بس يا مارك و بعدين لقيت ماما اتضايقت علشان انا مش بذاكر و عمال اتفرج علي الماتش فبصراحة مرضتش أزعلها و قمت طفت التلفزيون و بعدت أذكر.
مارك:( بإستهزاء) هاهاهاهاها..انت عملت كدة فعلا؟ أنا لو منك معملش كدة طبعا الماتش أهم من المذاكرة..و بعدين يا سيدي أن كان علي ماما فهي حتى شوية و بعدين حتسامحك..كل الأمهات طيبين يابني ...واضح انك معرفش حاجة...هاهاهاهاها
ريمون:( بغضب) متقولش عليا كدة!! أنا أعرف كل حاجة!!! و بعدين أنا ممكن مسمعش كلام ماما...عادي يعني..
مارك:(بتريقة ) بجد؟؟؟؟ دة انت بخاف من مامتك اوي...فاكر لما مرضتش تزور معانا من الحصة؟؟ فاكر قلتلنا ايه؟ (يقلد ريمون) معلش انا مش حقد أعمل كدة علشان لو المستر عرف و قا لماما حتزعقلي..هاهاهاهاها قال مبتخافش قال...يا جبان!!
(يدخل مينا و مارينا في هذة اللحظة )
مينا: بتتكلموا في ايه؟
مارك: أبدا..بأحاول أقنع ريمون انه خواف..هاهاهاهاها
مينا: اه طبعا خواف. ..دة بيخاف يطرد من الفصل.
ريمون(بغضب) يعني لما أنرفز المستر و أطرد من الفصل دي حاجة كويسة؟؟؟ هي دي الشجاعة؟ ؟
مينا: لأ بيوري انك خواف...هاهاهاهاها
مارينا(بدهشة و غضب) : إيه الكلام الغريب اللي نت بتقولوه ده؟ لأ طبعا الكلام ده غلط! إحترام المستر و إحترام نفسي في الحصة هو ده الصح بعينه..حاجة تخلي أهلي فرحانين بيا..كفاية انهم بيتعبوا علشاني..يبقي حلو لما المدرسة تناديهم و تقولوهم بنتكوا بتتصرف غلط! !!
ريمون : هو ده الكلام الصح..فهميهم يا مارينا.
مارك :( بتريقة ) طبعا لازم مارينا تقول كده..أصل كل البنات خوافيييين هاهاهاهاها
مارينا :اتريق براحتك يا مارك ...كلامك مش حيخليني أغير رأيي وأعمل الحاجة الغلط..سلام
(تذهب مارينا )
مينا :لو فعلا يا ريمون عايز تثبت انك مش خواف و ساعتها تبقي واحد من شلتوت. .يبقي تعمل اللي حقول عليه.
ريمون :ايه هو؟
مينا:مش انت مشترك معانا فى مجموعة العربي اللي بعد المدرسة علطول؟
ريمون : أيوة. .دي النهاردة. .و ماما عارفة إني حتأخر كمان.
مينا :تمااااام..النهاردة عندنا ماتش كورة بعد المدرسة ومش حنحضر المجموعة..تيجي معانا..قلت ايه؟
ريمون : (بتردد ) بس أصله...يعني..
مارك يوجه كلامه لمينا :يا عم مينا ما أنا قلت لك. ..ريمون ده خواف.
ريمون ( بغضب ) : أنا قصدي أني موافق. ..وحالعب معاوية.
مينا : هو د الكلام! !نتقابل بعد ما الجرس يرن.
(يذهب مينا و مارك و يبقي ريمون )
ريمون يكلم نفسه :أنا إيه اللي دبست نفسي فيه دة!! أزوغ من غير ما بابا وماما يعرفوا...طب لو الميس قالت لماما أني مرحتش المجموعة ماما حتزعل. .دة أنا وعدتها اني أشد حيلي في العربي و اشتركت في المجموعة علشان كده! ! بس أنت كان لازم تعمل كدة يا ريمون علشان تثبتلهم أنك مش خواف...و بعدين شلة مارك و مينا دي أحلي واحدة في المدرسة كلها..ياسلام لو بقيت واحد منهم.يالا مش حتحصل حاجة من مرة واحدة أزوغ فيها.
(يذهب ريمون ثم يسمع جرس المدرسة و يظهر الثلاث أصدقاء )
مارك:ياللا يا رجالة علي الماتش. ..جاهزين؟
ريمون و مينا : طبعا. ..ياللا بينا
(ينزل الثلاثة من المسرح و يسمع صوت لعبهم من خلف الستار...شوت. .العب..أيوة. ..باسي يا مارك..جوووووون...ثم فجأة يصرخ ريمون اههههه...رجلييييي و يظهر علي المسرح مع مارك و مينا )
ريمون:ألحقني يا مينا...ألحقني يا مارك...رجلي وجعاني اوي...شكلي عورتها و أنا بأشوت الكورة
مارك:معلش يا صاحبي..كان نفسي اساعدك. ..بس كدة حتأخر علي البيت...خلي مينا يساعدك...سلام
مينا وأشمعنا أنا يعني..ما أن برضة حتأخر و ماما حتقلق عليا..حاول تستحمل يا ريمون تمشي عليها.سلام..حساعدك المرة اللي جاية
ريمون : استنى بس يا مينا....آه يا رجلي...دي أخرة اللي يمشي ورا تصرفات غلط....و أنا اللي كنت فاكرهم أصحاب حلوين وكان نفسي أبقي واحد من شلتهم..أهم كلهم سابوني..مفيش مرة جاية خلاص..دلوقتي لازم أستحمل و أمشي علي رجلي..اههههه
(ينزل ريمون من علي المسرح ثم يظهر رجله مربوطة بشاش ومعه مامته)
ماما:نشكر ربنا يا ريمون. .الدكتور قال رجلك فيها جرح بسيط بس محتاج راحة
ريمون :أنا فعلا أسف يا ماما أني عملت كدة..أنتي وثقتي فيا و أنا مكنتش أمين..أنا كل اللي فكرت فيه اني اثبتلهم اني شجاع علشان أكون واحد من الشلة.
ماما :أنا مبسوطة أنك عرفت غلطتك فين يا ريمون..بس عايزة أقولك علي حاجة كمان. ..الشجاعة الحقيقية انك تقول للغلط لأ حتي لو كنت حتخسر أصحابك..الكتاب المقدس بيشجعنا نعمل كدة..مزمور واحد اللي انت حافظة...بيقول ايه؟؟
ريمون : طوبي للرجل الذي لم يسلك في مشورة الأشرار...
ماما :يعني يا بخته الشخص اللي مسمعش لرأي الأشرار ولا عمل بيه...الشخص دة بيكون ناجح في حياته...زي يوسف بالظبط لما مرضاش يسمع كلام مرات فوطيفار. .رغم أنه شغال عندها و هي دخلته السجن...لكن النتيجة انه بقي أعظم شخص في مصر بعد فرعون.
ريمون : كلامك صح يا ماما أنا اتعلمت درس عمري ما حأنساه.
(تنزل الأم و ريمون ثم يظهر مارك و مينا بيتكلموا )
مارك: فكرك ريمون عمل ايه امبارح؟
مينا:معرفش بس تلاقي مامته اديته عقاب محترم.
(يظهر ريمون من بعيد )
مارك:طب بس بس علشان هو جه ...
مينا:إزيك يا ريمون..رجلك عاملة إيه دلوقتي؟
ريمون : كويسة أشكر ربنا
مارك:أحب أقولك يا ريمون بعد اللي حصل امبارح انت بقيت واحد من شلتوت لأنك أثبت انك شجاع.
ريمون:بالعكس أنا كنت جبان امبارح لما خفت أقول لأ للغلط علشان مأخسركمش..أنا عرفت يعني إيه الشجاعة الحقيقية..و عايز أقولوكم اني مش عايز أكون من الشلة بتاعتكم دي...لما تشجعوا بعض تعملوا الصح ساعتها بس حأكون معاكو. ...سلام
( تغلق الستار )
تأليف : سالي أنيس