الصحفي : إزيكم يا أصحابي وحشتوني .. إنهاردة أنا عاملكم مفاجأة .. عارفين إيه هي ؟ .. استنوا أنا هقولكم .. المفاجأة هي ............. أاااااا .. أاااااااااا إيه ده .. أنا إزاي نسيت .. هو أنا كنت جاي ليه جاي ليه ؟ .. أنا نسيت .. أه افتكرت أنا جاي أعمل لقاء صحفي مع شخصية مشهورة جدااا ... عارفين مين ؟ الشخصية هي الشخصية هي .. هي مين ؟ يا ربي بردو نسيت .. طيب وبعدين .. حد منكم فاكر أنا كنت جاي أعمل اللقاء مع مين ؟ .. آه خلاص خلاص افتكرت .. احنا معانا انهارده ضيفة جديدة و مميزة جدا في حلقة جديدة من برنامجنا ... ركزوا معايا عشان هنتعرف عليها وهنديها الفرصة تحكي كتير عن حياتها.
خلينا في البداية نرحب بيكي معانا يااااا ....
راعوث: أنا إسمي راعوث ومبسوطة جدا إني أكون موجودة معاكم
الصحفي: أيوة صح انتي اسمك راعوث برافو عليكي .. و إحنا كمان مبسوطين بوجودك ... يللا أصحابي نفسهم يسمعوا حكايتك تحبي تبتدي منين الحكاية ؟
راعوث : الحقيقة حياتي مليانة أحداث منها الصعب ومنها الحلو ... خليني ابتدي من البداية خالص أنا كنت عايشة حياة عادية جدا في بلد اسمها مؤاب وكبرت واتجوزت.
الصحفي : اتجوزتي مين يا ترى؟
راعوث : اتجوزت واحد اسمه محلون وكان من بيت لحم
الصحفي : انتي من مؤاب وهو من بيت لحم ؟ أومال إزاي اتقابلتوا ؟
راعوث : في وقت حصل مجاعة في بيت لحم فجه وهو وأخوه وباباه ومامته عشان يهربوا من المجاعة ويكملوا حياتهم في مؤاب وبعدها مات الأب ...وبعدها بشوية اتجوزنا وأخوه كمان اتجوز بس للأسف الحياة ماكملتش زي ما كنامخططين ليها
الصحفي : ليه إيه إللي حصل ... احكيلنا
راعوث: إللي حصل إن محلون جوزي مات وكمان أخوه مات ... ومابقاش لينا راجل ياخد باله مننا ...بقيت أنا وحماتي وعرفة مرات أخو جوزي ومش عارفين هنعيش إزاي
الصحفي: يا خبر !!! وإزاي كملتوا حياتكم لوحدكم كده ؟ مين أخد باله من مين ؟
راعوث : إللي حصل إن نعمي إللي هي حماتي جت في يوم وفاجئتنا بقرار ... قررت إنها تسيبنا وترجع تاني لبلدها بيت لحم
الصحفي: طب وانتوا ؟
راعوث : مانا هاحكيلك ... لأن بالقرار بتاعها ده حياتي بدأت تتغير خالص نعمي قالتلنا إنه خلاص آن الأوان ترجعوا لأهلكم لأنه هي خلاص راجعة بلدها ومفيش حلول تانية
الصحفي : وبعدين ؟
راعوث: عرفة مرات أخو جوزي وافقت ورجعت لأهلها ... بس أنا كان ليا قرار مختلف وكان قرار غيّر حياتي
الصحفي : شوقتينا نعرفه يا راعوث .. هااااا
راعوث: قررت أنا كمان أرجع مع حماتي لبيت لحم وأعيش معاها وسط ناسها وأخد بالي منها ... وبعد مناقشات كتيرة معاها وافقت إني أرجع معاها وفعلا رجعنا سوا.
الصحفي : يااااه إزاي عملتي كده ؟ وليه ضحيتي التضحية الكبيرة دي !
راعوث : لأني كنت باحب نعمي وقررت أرجع معاها عشان أساعدها وأخدمها وأكون مسئولة عنها وفعلا بدأت أنزل كل يوم لحقل قمح عشان أجمع شوية نقدر نعيش بيهم ... وهناك في الحقل قابلت الراجل إللي ربنا باركني بيه وعوضني عن كل تعب وحزن في حياتي.
الصحفي : ياااااااه ... مين بقى احكيلنا بسرعة
راعوث : بوعز صاحب الحقل إللي شافني وسأل عني وعرف قصتي كلها وإزاي إني سبت بلدي وأهلي وجيت عشان أخدم حماتي.
الصحفي : وبعدين ؟
راعوث : وبعدين اتجوزنا وعيشنا حياة جميلة وجبنا بيبي جميل اسمه عوبيد .
الصحفي : قصة حياتك جميلة يا راعوث ومشوقة مابين حزن وفرح وإكرام من ربنا ... حقيقي اتبسطنا معاكي في حلقة انهاردة
راعوث : أنا كمان اتبسطت معاكم جدا... ربنا معاكم .. سلام
الصحفي : في نهاية حلقتنا أحب كمان أضيف حاجة مهمة حاجة مهمة جدا .. يوووووه نسيت تاني هو أنا كنت هقول إيه ؟ .. آه افتكرت راعوث جه من نسلها الرب يسوع وده كان قمة إكرام ربنا ليها .
كمان عايز أسيب معاكم آية جميلة فكرتني بيها قصة حياة راعوث ... فلا نفشل في عمل الخير لأننا سنحصد في وقته إن كنا لا نكل غلاطية 6 : 9
خليك وخليكي زي راعوث بتعمل الخير دايما واتأكد إن ربنا شايفك وهيكافئ محبتك وتعبك .
الصحفي : وبكده يكون وقت حلقتنا انتهى استنونا الحلقة الجاية مع ضيف جديد... سلااااام
www.madareselahad.org©