الشخصيات:- (بابا – ماما – ميرا – مايكل – مارك)
(المشهد الأول)
بابا قاعد على الكرسي ويصحى مايكل وميرا من النوم
بابا:- صباح الخير حبايبي عاملين إيه النهاردة ياترى نمتم بدري ولا متأخر زي كل يوم؟
ميرا:- صباح الخير يابابا
مايكل: صباح الفل على أحلى بابا في الدنيا ... طبعاً نمنا متأخر يابابا مش كفاية ف وقت المدارس بننام بدري.
بابا:- ماشي ياأستاذ مايكل أنا عارف إني مش هاخلص من لماضتك دي المهم ماتنساش انت وميرا الدرس المهم اللي اتعلمتوه في مدارس الأحد إن الوقت اللي الرب أدهولنا ده وزنة وهايسألنا عليه فبلاش نضيعه في أمور مش مفيدة.
مايكل وميرا: حاضر يابابا
مايكل:- أنا هانزل بقى يابابا علشان أروح الكنيسة.
بابا:- ربنا معاك يامايكل بس من فضلك ماتتأخرش علشان أنا ومامتك بنكون قلقانين عليك.
مايكل:- حاضر يابابا (وينزل من المسرح هو وبابا وميرا)
(المشهد الثاني)
مايكل يكون قاعد على الكرسي ويدخل مارك فيسلم عليه بحرارة
مايكل:- يامارك إزيك عامل إيه بقالك كتير مش بتييجي الكنيسة وحشتني جداً.
مارك:- ازيك يامايكل إنت اللي عامل إيه ...انت اللي واحشني أكتر.
مايكل:- أخبار الأجازة إيه معاك؟
مارك:- مقضيها فسح وخروجات كل يوم مع أصحابي.
مايكل:- يابختك ياعم
مارك:- آه شكلك مش مبسوط م الأجازة يامايكل
مايكل:- أنا الأجازة باقضيها مشاوير للعيلة كل شوية اطلع يامايكل وروح يامايكل وهات يامايكل ..حاجة كده إيه جميلة . يقولها (بتزمر)
مارك:- إيه ده هو إنت اللي بتروح تجيب الطلبات بنفسك؟!
مايكل:- أيوه طبعاً أنا أو بابا
مارك:- ياه دي حاجة صعبة أوي ...تعرف ان احنا عندنا ناس بتساعدنا في البيت وبيجيبوا لنا كل حاجة احنا محتاجينها.
مايكل:- كل حاجة..كل حاجة؟
مارك:- آه كل حاجة
مايكل بصوت هادي وتريقة (يابختكم مش زي عندنا)
مارك:- بتقول حاجة يامايكل؟
مايكل:- لأ أبداً أبداً مش باقول حاجة ...يالا بينا نحضر الأجتماع.
مارك:- يالا بينا
(المشهد الثالث)
ميرا على المنبر ويرن جرس الباب ويكون مايكل راجع من الكنيسة وميرا تفتح الباب
ميرا:- أهلاً يامايكل
مايكل:- أهلاً (بزعل)
ماما:- أهلاً يامايكل حمدلله على سلامتك ياحبيبي.
مايكل:- الله يسلمك ياماما (بزعل)
ميرا:- ممكن يامايكل أتعبك تجيبلي حاجة من السوبر ماركت.
مايكل:- نعم يااستاذة ميرا هو مافيش حد هنا غيري كل شوية انزل يامايكل وهات يامايكل وودي يامايكل.
ميرا:- معلش يامايكل علشان خاطري.
مايكل:- قولت مش نازل يعني مش نازل.
ميرا:- بقى كده يااستاذ مايكل..طيب أنا هاقول لبابا وماما عليك وتنده عليهم (يابابا .. ياماما تعالوا شوفوا مايكل)
مايكل:- يشاور بلامبالاة لميرا
ماما:- مالكم بس ياولاد متضايقيين من بعض ليه وصوتكم عالي كده ليه؟
ميرا:- يرضيك كده يابابا طلبت من مايكل يجيبلي حاجة من تحت وهو مش موافق.
بابا:- ليه يامايكل ياحبيبي مش عاوز تنزل تجيب لأختك اللي هي محتاجاه؟
مايكل:- مش هانزل يابابا أنا قولت مش نازل يعني مش نازل.
بابا:- إيه يامايكل العصبية دي؟ وإيه الطريقة اللي بتتكلم بيها معايا دي؟! (بحزم)
ماما:- فعلاً يامايكل إنت شكلك عصبي جداً ودي أول مرة تكلم باباك بالطريقة دي..
انت عمرك ماقولت لأي حد فينا إنك مش هاتساعده لما يكون محتاج حاجة منك.. إنت فيه حاجة حصلت لما نزلت الكنيسة زعلتك؟ قولنا ياحبيبي احنا عيلتك وبنحبك علشان نقدر نساعدك.
مايكل:- أنا زهقت من إننا مش معانا فلوس كتير ولا بنقدر نجيب كل اللي نفسنا فيه زي باقي أصحابي ..كلهم عندهم فلوس وحاجات أكتر مني وأنا لأ ....ده حتى مارك صاحبي عندهم ناس بتساعدهم في البيت وبينزلوا يجيبولهم كل اللي هما محتاجيه وكل يوم يخرج ويتفسح وأنا لأ... ليه بابا مش معاه فلوس كتير زي باباه ويقدر يجيبلنا كل اللي نفسنا فيه.
ماما:- إيه اللي بتقوله ده يامايكل عيب كده.
ميرا:- ياسلام يااستاذ مايكل طيب ماأنا عندي صحباتي البنات عندهم فلوس كتير ولبس كتير بس الموضوع مش مضايقني ولا عامللي مشكلة وكل واحد وإمكانياته المفروض إنت اللي ماتبصش على حد وتغير منه وكمان لازم تكون عارف ومتأكد إن ربنا أدالك حاجات تانية مهمة وغالية وممكن ماتكونش عندهم.
مايكل:- مارك عنده كل حاجة وباباه يقدر يجيبله أي حاجة.
بابا:- مايكل ياحبيبي أنا عارف إنك ممكن مايكونش معاك فلوس كتير زي باقي اصحابك لكن افتكر انك معاك حاجات غالية ومهمة.
مايكل:- أنا يابابا !!! ...معايا إيه؟! (بإستغراب)
بابا:- معاك عيلة بتحبك وموجودين حواليك دايماً ...عندك أصحاب قريبيين منك وبيحبوك ...عندك كمان صحة وتقدر تتحرك وتمشي من غير ماتكون تعبان أو بتاخد أدوية وحاجات تانية كتير تقدر تشكر ربنا عليها.
مايكل:- ايوه يابابا ماطبيعي يكون عندي كل الحاجات دي اللي حضرتك بتقوللي عليها.
بابا:- لأ مش طبيعي يامايكل يكون عندك الحاجات دي... فيه ناس معاهم فلوس بس مش عندهم عيلة تحبهم ولا بيقدروا يقعدوا ويقضوا وقت معاهم بسبب انهم بيشتغلوا وقت طويل علشان يجيبوا الفلوس دي.
وممكن يكون معاك فلوس لكن مش عندك اصحاب يحبوك ويكونوا دايماً معاك وحواليك طول الوقت زي أصحابك.
ياترى لو تحب تختار بين إنه يكون عندك فلوس كتير جداً ومايكونش عندك ولاعيلة ولا اصحاب ولا صحة؟ تحب تختار أنهي فيهم يامايكل؟
ميرا:- تعرف يابابا وحضرتك بتتكلم افتكرت ساندي صاحبتي رغم ان باباها غني جداً وعنده فلوس كتير لكن هي تعبانة جداً ومش بتقدر تاكل وتشرب وتخرج زينا كده ودايماً لما بنزورها بتفضل تقوللنا انها نفسها تقدر تعمل الحاجات البسيطة اللي بنعملها دي زي الأكل والشرب والخروج مع أصحابها.
ماما:- فعلاً يا ميرا عندك حق على الرغم من إن ساندي باباها معاه فلوس كتير جداً لكن مش عارف يساعدها انها تكون بتخف وتكون كويسة وبخير. وبالرغم من كده بتفضل تشكر الرب يسوع علشان عندها عيلة وأصحاب قريبيين منها وجنبها.
بابا:- ياترى يامايكل تحب تكون زيها كده ومعاك فلوس كتير.
مايكل:- لأ يابابا الحقيقة لما اتكلمت معاكم كان الموضوع مضايقني جداً لكن انا عمري مافكرت فيه بالطريقة دي أبداً وكنت بافكر إنه ازاي يكون معايا فلوس وبس وبانسى اشكر ربنا على اللي عندي ومديهولي حتى لو أنا شايف انه طبيعي الحاجات دي تكون عندي ...حقيقي أنا أسف يابابا وآسف ياماما وآسف ليكي إنتي كمان ياميرا.
بابا:- جميل يامايكل انك تعتذر وتكون عارف انك فكرت بطريقة مش صح ...بس عاوز افكرك ان الشيطان دايماً عاوز يبين لنا اننا مش عندنا حاجات زي الفلوس او غيرها كتير لأنه مش بيحب يشوفنا راضيين وبنشكر ربنا على الحاجات اللي ادهالنا لكن عاوزنا نكون طول الوقت بنتذمر عليه. وعاوزك تعرف انك اتعلمت تشكر هاتلاقي حاجات كتير جداً تشكر الرب يسوع عليها. (ياترى يااصحابي تعرفوا ايه ممكن نشكر الرب يسوع عليه؟) نسمع الاولاد
فعلاً كل اللي بتقولوه صح جداً .. تعالوا نتعلم آية حلوة جداً موجودة في رسالة بولس الرسول لاهل افسس 5 : 20
واللي بتقول (شاكرين كل حين على كل شئ)
ومعنى الآية اننا نكون دايماً بنشكر ربنا على الحاجات اللي ادهالنا طول الوقت.
ونكرر الآية مع الاولاد
وبعد كده نصلي معاهم
وبعد مانخلص نختم بترنيمة أشكر ربك على كل اللي عندك علشان اللي عندك حلم كبير لناس كتير
إيفون رزق
جمعية خلاص النفوس بحلوان
©www.madareselahad.org