(فوفو يروح مدارس الأحد ويحكي لصاحبته هادية حكاية خناقته مع اصحابه)

فوفو:  اسكتي أما أنا انهارده عملت شوية حاجات بعد المدرسة مش هتصدقي

هادية : إيه عملت إيه يعني؟

فوفو : الواد زركش عارفاه

هادية : اه ماله الواد ده؟

فوفو : وأنا طالع من المدرسة زقني وكان زحمة بقى وافتكر إني ما اخدتش بالي

هادية : وانت عملت إيه يا فوفو أنا عارفة الواد ده شراني؟

فوفو : على مين يا بنتي بهدلته طبعا ( ده أنا شتمته وقلتله يا كذا )

هادية : تشهق وتقول له ياااااه بقى قولتله يا كذا

فوفو : اه  

هادية : يا ابن الايه طيب وقولتله إيه كمان؟

فوفو : قولتله يا ابن كذا وكذا وكذا

هادية : تؤتؤ كل ده ده انت افتريت

فوفو : اه امال إيه امال اسيب حقي كان لازم الواد ده يتربى

هادية : يا فوفو أنا عايزة اقولك على حاجة

فوفو : إيه يا هاديه طبعا عجبتك مش كده؟

هادية : مممم الصراحة الأخ أندرو كان واقف وراك طول الوقت وسمع كل الشتايم دي ... هههههه وتضحك ضحكة شريرة

فوفو : يا نهار اسووووود بجد ( ويبص للأستاذ أندرو )

أندرو : يا فوفو الكلام إللي بتقوله ده بجد

فوفو : إيه يا أستاذ أنا ما ضربتوش أنا شتمته بس

أندرو : طيب ما الشتيمة كمان غلط

هاديه: إيه هو ده الشتيمة غلط في إيه

فوفو : أيوه إيه يعني شتمته عادي

أندرو : لا ربنا قال دي خطية ( لا تخرج كلمة ردية من أفواهكم )

هادية : أيوه يا أخ ـندرو بس دي خطية صغننة مش كبيرة يعني

أندرو : الكتاب المقدس قال ( من قال لأخيه يا أحمق يكون مستوجب نار جهنم)

هادية: يالهوي نار جهنم مره واحدة سامع يا فوفو هاتروح النار ( وتغيظه )

فوفو : لا عادي مش هاروح النار أنا محدش شافني من الناس بتوع الكنيسة أنا هاعمل كده مع اللي يستاهل بس ومش لازم الأستاذ أندرو يعرف

أندرو : ولا كده كمان ينفع يا فوفو لأنك بتعمل الخطية دي قدام ربنا إللي شايف كل حاجة وبعدين انت لما تبطل شتيمة إنت بتعمل كده لربنا مش علشان الناس تقول عليك مؤدب

هاديه : تضحك وتقول مؤدب اااااااااه ده فوفو ده قمة في الأدب

فوفو : إنتي مالك يا هادية يا كذا

اندرو : تاني بتشتم يا فوفو

فوفو : أعمل إيه بس يعني طيب ما كل الناس بتشتم كل إللي أعرفهم بيشتموا وبيقولوا أكتر من كده كمان , دي حتي ماما ماما بتشتمني علي طول  وتقولي يا كذا و يا كذا

أندرو : يا فوفو انت لازم تكون قدوة لغيرك حتى لو كان أكبر منك , ماما مش لازم تكون صح في كل حاجة وبعدين كل واحد مسئول عن نفسه قدام ربنا الكتاب قال أنت بلا عذر أيها الانسان احنا ينفع نقلد الكبار في الحاجات الكويسة

هادية : مامتي أنا كمان بتشتمني بصراحة يا أستاذ , تفتكر ماما كده تروح النار يعني

أندرو : إنتي يا هادية المفروض تقوليلها إن الشتيمة بتزعل ربنا وتساعديها تحاول تبطل كمان

 فوفو : يا أستاذ أندرو إنت عايش في عالم تاني , دلوقتي إنت مش عايزنا نشتم طيب وأصحابي يقولوا عليا إيه , إنت عايزهم يشتموني واسكت لالالالالالا أنا مش واد أي كلام لازم أرويهم إني جامد

هادية : ما هوه بصراحة يا أستاذ لو بطل يشتم خالص العيال هاتتريق عليه وهايفتكروه هافية

أندرو : بالعكس عارفين إن الأقوي هو إللي بيعرف يمسك نفسه عن الغلط . الغلط سهل أوي لكن لو اتحكمت في أعصابي هاكون أقوي يمكن يتيريقوا عليا مره واتنين لكن بعد كده هايقولوا عليا إني قوي بربنا ومؤدب 

هادية : يااااه يا أستاذ بس إني أبطل شتيمة دي حاجة صعبة جدا الصراحة أنا حاولت الصراحة بس كل ما أصحي في يوم وأقول إني هابطل اشتم ألاقي نفسي باشتم أول واحدة تضايقني في المدرسة

أندرو : لو صليتي وطلبتي معونة ربنا هو هيساعدك والكتاب قال : ( قوتي في الضعف تكمل ) يعني كل ما أحس إني ضعيف مش قادر أبطل حاجة اطلب معونة ربنا وهو هيساعدني

فوفو : معاك حق يا أستاذ انا هاجرب موضوع إني ما اشتمش ده وحتى لو وقعت مرة هاصلي ربنا يساعدني

©www.madareselahad.org