الشخصيات:  الراوي – يسوع – أب – أم – جار – تلميذ 1 – تلميذ 2

الراوي : تعرفوا إن الرب يسوع بيحب الأطفال ؟ تعالوا نقابل أسرة جابت أولادها للرب يسوع عشان يباركهم .

(موسيقى)

الراوي : في بيت صغير في مدينة الجليل كان فيه أسرة يهودية بيتغدوا سوا ...

(أصوات أسرة بتتغدى)

الأب: أنا سمعت أخبار جميلة انهاردة ... المعلم – الراجل إللي اسمه يسوع -وهو مسافر هيعدي في منطقتنا ... مش بعيد من هنا

الأم: ياه ... أنا سمعت قصص كتير عنه ، شفى شحات أعمى وراجل مكنش بيعرف يمشي وكمان قوّم بنت ميتة .

الأب: أه وأنا كمان سمعت القصص دي ... بس أنا كمان سمعت إنه معلم وبيحكي قصص عن ملكوت الله ... أنا نفسي أسمعه وهو بيتكلم .

الأم: وأنا كمان ...إيه رأيك نروح بكرة ؟إحنا ممكن ناخدها مشي وناخد معانا أكل .

الأب: طب وأولادنا؟

الأم: في الحقيقة أنا بتمنى نقدر ناخدهم معانا عشان يسوع يباركهم

الأب: فكرة هايلة ... خلينا نعمل كده ... ناخد الأولاد بكرة ونروح نشوف يسوع ... نروح نسمعه وهو بيحكي قصص وكمان نشوفه وهو بيشفي الناس وكمان نطلب من الرب يسوع إن يبارك أولادنا.

الراوي: وتاني يوم جهزوا حاجتهم وبدأوا رحلتهم عشان يشوفوا يسوع

(صوت ناس بتمشي وبتحيي بعض)

الأم: إيه ده !!! ده مش احنا بس اللي جايين من قريتنا عشان نشوف يسوع

الأب: أيوه ... ده واضح كده إن نص أهل القرية ماشيين معاه

جار: أنا شايفكم جايبين أولادكم معاكم ... إحنا كمان جايبين أولادنا معانا عشان يسوع يباركهم

الأم: أنا شايفة يسوع هناك أهو ...مش قادرة أصدق أنا مبسوطة قوي ...  يا أولاد شايفين يسوع؟؟

(أصوات ناس شايفة يسوع)

الأب: لو سمحت ... إنت واحد من تلاميذه ... صح؟

تلميذ 1 : أيوه أنا بساعد يسوع ، هو هنا عشان يبشر بملكوت الله ... استنى ... إنت رايح فين بالأولاد دول كلهم ؟؟ إنت جايبهم هنا ليه؟

الأب: إحنا جبناهم معانا هنا عشان يسوع يحط إيده عليهم ويطلب من ربنا إنه يحافظ عليهم

تلميذ 2 : لا ... معلمنا عنده شغل كتير ... فيه ناس كتير جايين وطالبين منه حاجات كتير واحنا عايزين نحميه عشان ميتعبش.ومعلمنا معندوش وقت للأطفال ... ياللا خدوهم على البيت ...ياللا إمشوا دلوقتي

( أصوات تذمر الناس)

الأب : من فضلك ... ده إحنا جايين السكة دي كلها عشان خاطر أولادنا ،إحنا بس عايزينه يباركهم .., من فضلك متخليناش نمشي

تلميذ 1 : هو معندوش وقت للأطفال ... ياللا روّحوهم

( الناس تهدأ)

الراوي: ولما يسوع شاف إللي تلاميذه عملوه قال :

يسوع: "دعوا الأولاد يأتون إليّ ولا تمنعوهم لأن لمثل هؤلاء ملكوت السموات ومن لا يقبل ملكوت الله مثل ولد فلن يدخله"

(موسيقى)

الراوي: و الرب يسوع خصص وقت عشان يلمس كل طفل جابوه له . وبارك كل الأطفال لما حكى ليهم عن حب الله العظيم ليهم.

الراوي: لو عايز تقرا أكتر عن البركات إللي الرب يسوع مجهزها لينا إقرا إنجيل متى في العهد الجديد في كتابك المقدس

مترجم من : www.kidscorner.net

© www.madareselahad.org