دراما الصلب والقيامة (خدمة الجمعة العظيمة)

1ـ سمسمة شايلة خطاياها

2 ـ مشهد الصليب

3 ـ مشهد القيامة

سمسمة شايلة خطاياها

(تقدم دراما سمسمة على مشاهد متقطعة تتخلل برنامج اليوم من تسبيح ودراما ).

( يقدم المدرس سمسمة فيحيها الأطفال ، وترد تحيتهم ).

المدرس : سمسمة النهاردة جاية تحضر معانا الجمعة العظيمة ، هى بتحب أوى تيجى وتسبح وتصلى ، إيه ده ؟ سمسمة عملت حاجة وحشة ( تنفخ بالون بيدها قليلاً وتمسك فوهتها بكلبس ورق ) سمسمة رايحة جاية عادى ولا كأنها عملت خطية ،  حدّ شافها إعتذرت لربنا؟ لأ ؟ مش عارف إزاى سمسمة قادرة تعيش كده .

**ترنيمة أو ترنيمتين ، تشارك بها سمسمة ، وهى تحمل البالون وتبدو سعيده .

(تقف أمام الأطفال وتنفخ البالون ) سمسمة عملت غلط تانى فى حق ربنا ، سمسمة إنتى إعتذرتى لربنا ؟ ( تهز كتفيها فى عدم إكتراث ) سمسمة متعودة تروح المدرسة والنادى وكل مكان وهى معاها خطاياها ، دى حتى كانت بتسبح الله معانا دلوقتى وهى شايلاهم  أنا مستغرب سمسمة أوى (تنفخ البالون على أقصى حدّ له ، يراعى إلا يفرقع ) ياااااه إيه ده يا سمسمة كفاية كده ، كل دى خطايا عايشة بيها ؟  ( ترفع البالون على ظهرها وتنحنى أسفل ثقله ، نرى تأثير ذلك على ملامح وجهها أنها حزينة ومتعبه ) (يتجه المدرس الى حيث البالون وكأنه يقرأ ، فى فزع ) إيه ده شتيمة ، حلفان ، كذب ، نميمة ، سمسمة مش مبسوطه خالص ، سمسمة حاسة إن خطاياها تقيلة ، بس برضة هى ماشيه بيها عادى . سمسمة مش عارفة تعمل إيه.

**تسبيح تشارك به سمسمة وهى منحنية الظهر من ثقل خطاياها ، تحاول أن تؤدى الحركات مع الأطفال بصعوبة .

المدرس : سمسمة تعبانة أوى من الشيلة اللى شايلاها دى ، سمسمة مش عارفة تسبح ولا عارفة تصلى ، سمسمة حزينة أوى ، بس برضو هى شايلة خطاياها وماشية بيها .

**تسبيح نرى سمسمة تقع ، تمشى بصعوبة  

مشهد الصلب

المدرس : كان فيه ولد إسمه فادى ، فادى كان بيحب الناس أوى ، أكتر حدّ ممكن تشوفوه بيحب الناس ، كان بيحب يساعدهم حتى لو كان هو تعبان ، كان بيضحى علشانهم بوقته وراحته وفلوسه ولعبه ، كانت الناس بتحب فادى أوى ودايماً لما يشوفوه معدّى يجروا عليه ويتلموا عليه ، كمان كلام فادى كان حلو أوى ، كل الناس عاوزه تسمع فادى ، عاوزه تقعد مع فادى عاوزه تتكلم مع فادى ، فادى فادى فادى ......( نرى سمسمة تعدّى من أمام المدرس متعبة مرتبكه من حملها تكاد تقع يسندها ويكمل كلامه )  الحكاية دى ضايقت ناس منه أوى ، كانوا بيغيروا منه ، إتفقوا مع بعض عليه ، إحنا لازم نكره الناس فيه ، نقول إنه عمل حاجات معملهاش ، إنه غلط فى حقهم وحق الله ، مش بس قالوا كده لكن كمان هما ضربوه ، شتموه ، قطعوا هدومه وعروه ، الحكاية دى حصلت بجد ، واحد ماكنش إسمه فادى لكن هو فعلاً فادى علشان هو اللي فدى كل الناس.

(نسمع موسيقى تصويريه ، على صوت المدرس ).

 يسوع الفادى ، كان إنسان مش عادى

قبضوا عليه ، هانوه ، عذبوه ، علشان الناس حبوه.

( يدخل يسوع من الباب الخلفى ، يرتدى جلباب ممزق ، فى وسط عدد من الجنود ، وسط ضحكاتهم وصخبهم ، وكلمات إستهزائهم به ).

ـ السلام ياملك اليهود      ـ خلص نفسك ياملك ، إيه مش عارف ؟  ( أصوات ضحكات ) ( نرى أحدهم يدفعه فيقع ، أصوات ضحكات ـ حين الوصول أمام الأطفال والصعود الى المسرح ، يلطمه أحدهم ) هه إتنبأ مين ضربك ؟

( يفرد يسوع يديه كالمصلوب ، نرى المشاهد على كلمات المدرس ).

المدرس :  يسوع المسيح صلبوه ، على الخشبة علقوه ، والمسمار فى إيديه ورجليه دقوه (يدق المدرس على المايك مع دقات المسامير ـ نسمع تأوهات يسوع ) إكليل من شوك على راسه حطوه ، ( نرى سمسمة وهى منحنية تحت حملها تقف أمام الصليب ) يسوع المسيح صلبوه ، علشان خلاصى وخلاصك عذبوه أهانوه ، وبحربة فى جنبه طعنوه ( نسمع أهة يسوع وينكس الرأس ) مات يسوع .

( تطفئ أنوار القاعة ، يسنده الجنود ويخرجونه خارج القاعة من الباب الجانبى ).

( تضاء أنوار القاعة  ، سمسمة تستدير لتواجه الأطفال وهى لازالت منحنية تحت ثقل حملها).

المدرس : سمسمة شافت يسوع المصلوب ، سمسمة حبت يسوع النهاردة  أكتر من أى يوم ، سمسمة قالت يسوع حبنى كل الحب ده ؟ يسوع إتعذب علشانى كل العذاب ده ؟ إزاى أنا لسه شايله كل الخطايا بتاعتى دى مع إن يسوع شالها خلاص على الصليب ، سمسمه قررت تتخلص من خطاياها الكتيرة اللى تاعباها ( سمسمة ترفع البالون لأعلى بصعوبة لأنه ثقيل جدا ) سمسمة رفعت خطاياها التقيلة لفوق لفوق وقالت يارب أنا غلطانه فى حقك ، مش هشيل خطايا تانى وأمشى بيها ، أنا كرهتها ، يارب خلصنى منها ( تنزع كلبس الورق فتطير البالونه لأعلى ـ نرى سمسمة تتحرر من الثقل وتقفز فرحة ) سمسمة مابقتش ماشية محنية ولاحزينة سمسمة فرحانة وخفيفة وتقدر تسبح ربنا معانا دلوقتى وهى بتنط وسعيده .

**ترنيمة تشارك بها سمسسمة فى نشاط ومرح

                                     مشهـــد القيامة       

المدرس : مع إن عذاب يسوع وموته حاجة صعبة علينا لكن إحنا بنحتفل بيها النهاردة مش بس علشان بموته وعذابه خلصنا من خطيتنا لكن علشان يسوع ما اتهزمش بالموت ،يسوع إنتصر على الموت وفى اليوم التالت قام

( يخرج يسوع من الباب الجانبى ، يلبس ملابس بيضاء ويضع وشاح أحمر )

**ترنيمة عن القيامة تشارك بها سمسمة فى فرح وهى تتقافز حول يسوع الذى يمر بين الأطفال ليرحب بهم حتى يخرج

تأليف : أ/ منى نيقولا