المشهد الأول :

 ( في البيت )

كركر : أهلا وسهلا بيكم يا أصحابي ... أحب أعرفكم بنفسي ... أنا اسمي كركر ...كركر المفكر المكركر مفكر لأني بأحب أفكر وبافهم في كـــــــل حاجة ... ومكركر علشان بأحب أضحك علطول ... هاهاها  ( تظهر الأم )

الأم : إنت لسه مارحتش المدرسة ... يابني هاتتأخر وبعدين مش هيرضوا يدخلوك المدرسة

كركر : وماله يا ماما ... أهو أبقى أخدت يوم أجازة هاهاهاها

الأم: يووووه يا كركر ، مله ضحك في ضحك في تهريج كده ! أنا باتكلم بجد، لو اتأخرت على المدرسة ومارضيوش يدخلوك ( بلهجة تهديد ) عقابك هيكون معايا شديد ... إنت فاهم ؟ !

كركر : (يجري ) لااااا ولا عقاب ولا حاجة سلاااام ... أنا ماشي

المشهد الثاني:

( في المدرسة -كركر واقف ثم يأتيه صديقه فرفور )

فرفور : صباح الخير يا أستاذ كركر ... عامل إيه ؟

كركر : صباح النور يا فرفور يا صديق الطيور ... حلوة دي مش كده هاهاها

فرفور : طول عمرك كده يا كركر تموت في الهزار ... المهم عملت واجب الحساب ؟

كركر : ماتجبليش سيرته ده أنا قعدت أحل في المسائل لحد ماحسيت إني مبقتش عارف الواحد من الإتنين !!! يا ابني أنا خفت على نفسي خفت أنسى الضحك

فرفور : معاك حق ده كان واجب صعب أوي !! يا رب المدرس ميديناش زيه تاني

كركر : مينفعش يا فرفور ... ده أستاذ خطاب بتاع الحساب يحب يدي واجب كله صعاب ... حلوة دي مش كده ؟ هاهاها

فرفور : يوووووه عليك يا كركر

( تأتي صديقتهم نوسة )

نوسة : أهلا أهلا ... أزيك يا كركر أزيك يا فرفور

كركر وفرفور : إحنا كويسين وإنتي عاملة إيه ؟

فرفور : عاملة إيه نوسة ؟

نوسة : أنا تمام أشكر ربنا ... مبسوطة أوي إني رايحة الكنيسة انهاردة

كركر : كنيسة ؟ إنهاردة ؟ ليه ؟

نوسة : إنت ناسي إننا في إسبوع الآلام يا كركر ؟

كركر : آه ده أنا نسيت خالص

فرفور : وعامل لي بتفهم في كل حاجة ... ده إنت طلعت ناسي كل حاجة هاهاها

كركر : إيه يا أستاذ فرفور عجبتك أوي !!!

نوسة : بطلوا هزار إنتوا الإتنين ياللا بينا على الطابور علشان الأستاذ مايزعقلناش

(تنزل العرائس من على المسرح ثم تطلع مرة أخرى على صوت جرس المدرسة )

فرفور : أنا ما صدقت إن الفسحة جت !!!

كركر : معاك حق كانت حصص صعبة ... أنا ممكن أسألك سؤال يا فرفور ؟

فرفور : إتفضل

كركر : إنت ليه عمرك ما جيت مدارس الأحد معايا مع إننا أصحاب من زمان؟

فرفور : ما إنت عارف يا كركر أنا مابقدرش اقعد كده من غير ما ألعب أو أتفرج على التليفزيون

كركر : ( بيتكلم كأنه حكيم جدًا ) إنت عارف يا فرفور أنت كده بتخسر خسارة كبيرة ... عارف مدارس الأحد مهمة جدًا

فرفور : بالمناسبة دي أسألك سؤال

كركر : ( بفرحة ) إنت جيت للشخص المناسب يا فرفور ... اتفضل إسأل

فرفور : إحنا داخلين على أجازة عيد القيامة ... وأنا مبسوط جدًا جدًا جدًا

كركر : ومين سمعك يا فرفور أنا كمان مبسوط ... بس هو ده السؤال ؟ ده طلع سهل أوي هاهاهاها

فرفور : هو أنا أصلا سألت ؟ ما تديني فرصة !

كركر : احم احم ... بالراحة ... ياللا إسأل

 فرفور : هو ليه إحنا بنحتفل بالقيامة ؟؟ هي مهمة يعني ؟؟؟

كركر : هه ؟ آه ده سؤال جميل جدًا جدًا جدًا ومهم جدًا جدًا جدًا ... (يكلم نفسه ) ده إنت إتزنقت زنقة يا كركر إنما إيه
(يكلم فرفور ) زي ماقلتلك يا فرفور ده سؤال مهم أوي وعلشان كده مش ممكن أجاوبك عليه إنهارده

فرفور : نعم ؟؟!!

كركر : أيوه أمال إيه ... لا يمكن إنهاردة ، بكرة على روقان كده أفهّمك كل حاجة ... ياللا بينا دلوقتي علشان نوسة بتنادي علينا ... أيوة يا نوسة

(تنزل العرائس )

المشهد الثالث :
( في البيت )

كركر : يا ماما يا ماما

الأم : إيه يا كركر فيه إيه ؟

كركر : هي ليه القيامة مهمة ؟

الأم : طب مش هتستنى تغيّر هدومك ؟

كركر : يا ماما بس جاوبيني

الأم : يا حبيبي الرب يسوع مات على الصليب ليه ؟

كركر : عشان يدفع ثمن خطيتنا

الأم : تمام ... تخيل لو كان الرب يسوع فضل في القبر بعد ما مات كان بكده هيكون كمل العمل إللي عمله على الصليب ؟

كركر : حلو أوي تمام ... ياللا أنا رايح أتغدى

الأم : أصبر يا كركر أنا مكملتش كلامي

كركر : هو لسه فيه كلام !

الأم : طبعًا ... أسألك سؤال تاني ... مين إللي قوم الرب يسوع ؟

كركر : محدش طبعًا ده سؤال ؟ هو قام لوحده

الأم : تمااااام  وانتصر على الموت و إحنا كمان لو نآمن بيه بيدينا نصرة على الموت وحتى لو فيه حد من أولاده مات على الأرض هيجي يوم  والرب يسوع يقومه تاني وياخده معاه السما .

كركر : يااااه يا ماما ده الموضوع طلع كبير أوي وأنا مش واخد بالي ... أشكرك جدًا جدًا ... أسألك سؤال : هو الغدا إيه إنهاردة ؟

الأم : عدس

كركر : عدس !

الأم : إيه مش عاجباك ؟

كركر : أنا أقدر أقول كده يا ماما ... شكرًا يا ستي على كل حاجة

الأم : أيوه كده يا كركر بدأت تتعلم الشكر... ياللا روح غيّر هدومك وأنا أكون جهزتلك الغدا

(تنزل العرائس )

المشهد الرابع :

( في المدرسة )

كركر : يا فرفور يا فرفور يا فرفور يا فر ...

فرفور : بالراحة يا كركر مالك فيه إيه

كركر : تعال أحكيلك دي القيامة طلعت حلوة أوي

فرفور : بجد ؟
 

(تنزل العروستان ثم يظهر كركر  )

كركر : أنا حكيت مع فرفور و اتبسط أوي لما سمع الكلام ده وكمان وعدني إنه هيجي معايا مدارس الأحد المرة الجاية

وأنا عايزكم تفتكروا يا أصحابي إن الرب يسوع عمل كل حاجة علشان نعيش فرحانين معاه و نروح معاه السما بس كل إللي عايزه منك إنك تفتح له باب قلبك وتطلب منه إنه يدخل قلبك ويطهره و يغيّر حياتك ... ها سيب معاكم آية حلوة بتقول :

" هانذا واقف على الباب وأقرع.إن سمع أحد صوتي وفتح الباب أدخل إليه وأتعشى معه وهو معي." رؤ 3 : 24

الرب يسوع مستنيك ... تروح له ؟

            سالي أنيس

© www.madareselahad.org