مسرحية  حتى ولو : دانيال

الشخصيات :  دانيال – الملك داريوس – وزير 1 – وزير 2 – وزير 3 – حارس 1

المشهد الأول (الوزراء واقفين يتحدثون مع بعض)

وزير 1 : أخبار المملكة  ايه؟

وزير 2 : تمام..أمور المملكة متنظمه كويس...

وزير 1 : و الحسابات؟ مش عايزين أي مشاكل في المملكة!

وزير 3 : كل الحسابات مظبوطة و المملكة بتزدهر.. كل حاجة كويسة، ماعدا وجود إللي اسمه دانيال ده!!!

وزير 1 : يااااه ... متجبليش سيرته!!

وزير 2 : أنا مش عارف هو في إيه زياده عننا علشان الملك يكون مبسوط بيه كده و مش شايف غيره.

وزير 3 : أنا سمعت كده انه الملك بيفكر انه يخليه مسئول عن المملكة كلها.

وزير 1 : نعم!!

وزير 3 : أيوه، زي ما بقولكم كده ..دانيال يبقى رئيس الوزراء .

وزير 2 : انتَ عارف معنى الكلام ده ايه؟

وزير 1 : و دي عايزه تفكير؟؟ يعني دانيال حيكون رئيسنا!! وبعدين ليه مكونش أنا رئيس الوزراء؟؟

وزير 3 : ياســـلااااام... اشمعنى انتَ؟ ما ابقى أنا؟؟؟

وزير 2 : انتَ إزاي يعني؟ انتَ لسه مبقيتش وزير أصلاً.. أنا ممكن ابقى رئيس وزراء.

وزير 1 : ده وقته؟ انتو حتتخانقوا ونسيب إللي بيحصل ده، لحد ما نلاقيه بقى فوق راسنا!!

وزير 2 : دِلنا يا ناصح!! نعمل إيه؟

وزير 1 : نمسك عليه غلطة!!

(وزير 2 ، وزير 3 يضحكوا)

وزير 3 : كان غيرك أشطر!!

وزير 1 : قصدكوا إيه؟

وزير 2 : إنتَ كأنك مكنتش معانا ، و احنا بنحاول ندور وراه على اي غلطة نمسكها عليه ... أول ما اتعين معانا!!

وزير 3 : إنتَ ناسي لما في يوم قعدنا نراجع كل كشوفات الحسابات، و قلنا يمكن يكون حط حاجة في جيبه كده ولا كده ...لقينا الحساب مظبوط.

وزير 2 : و الأكتر من كده... إنه الحسابات إللي هو مسئول عنها، ربحت أكتر من أي حد تاني!!

وزير 1 : بصراحة حظه حلو!

وزير 2 : مش مسألة حظ... متنكروش إنه الراجل ده مختلف عن أي حد اتعين في المملكة قبل كدة. أنا مشفتش وزير في أمانتة بصراحة.

وزير 3 : ايوه بدليل انه مفيش ملك عدى على المملكة مكرمهوش!!

(يدخل دانيال في هذه اللحظة).

وزير 1 : طيب بس بس علشان أنا شايفة جاي ناحيتنا.

دانيال : مساء الخير..

وزير 3،2،1 : مساء النور.

دانيال : كنا عايزين نحسب مبالغ الجزية إللي جمعوها الولاة.. أنا حساباتي جاهزة.. نتجمع النهارده في آخر النهار؟؟

وزير 1 : طبعاً طبعاً..

دانيال : تمام..و أنا مش حتأخر عن ميعادي...سلام.

وزير 2 : أنا نســيت الموضوع ده خااااالص... ده أنا محتاج أظبط حاجات كتير.

وزير 3 : شفته بيتكلم بثقة إزاي!!

وزير 1 : أيوه  هو طول عمره كده!!

وزير 2 : طبعاً معندوش حاجة يخاف منها!! كل شغله مظبوط و معمول صح!! أنا لازم أسيبكم دلوقتي علشان الحق أقفل الحسابات بتاعت الولاة إللي أنا مسئول عنهم. سلام..

وزير 1 لوزير 3 : و احنا كمان ياللا نمشي من هنا.

__________________________________________________________

 المشهد الثاني

(وزير 1،وزير 2 ودانيال واقفين أمام الملك داريوس و معهم كشوفات.

الملك داريوس: شكراً ليكم ...شغلكم تمام!!

وزير 1 : أهم حاجة إنو جلالتك راضي علينا.

وزير 2 : إحنا يشرفنا اننا بنخدم في المملكة العظيمة للملك داريوس!!

الملك داريوس: شكراً شكراً، و انتَ يا دانيال مش عايز تقول حاجة!!

دانيال : لأ جلالتك..

الملك داريوس: أنا بأفكر إني أعينك رئيس للوزراء يا دانيال..

أنا مشفتش إنسان زيك.. أمين ومختلف عن كل إللي حواليه.

دانيال: دي ثقه عظيمة يا جلالة الملك.. بأشكر إلهي إللي مديني النعمة دي عند جلالتك.

الملك داريوس: (للوزراء) خلاص إمشو انتو دلوقتي ، ولما أعوزكم حأبعت أجيبكم. و انتَ بقى يا دانيال تعالى معايا، في موضوع شاغلني عايز آخد رأيك فيه.

(يذهب دانيال والملك إلى جانب االمسرح،والوزراء إلي الجانب الآخر).

وزير 1 : أنا خلااااص مبقتش مستحمل إللي اسمه دانيال ده!!

وزير 2 : شفت الملك معجب بيه ازاي.. ده مش شايف غيره!

وزير 1 : و رجع تاني يقوله إنه عايزه يبقى رئيس وزراء!!

وزير 2 : إحنا لازم نشوف حل و بسرعة.

وزير 3 : أكيد بتتكلموا على دانيال!!

وزير 2 : عرفت منين؟؟

وزير 3 : ده مفيش حد من المرازبة مبيتكلمش عنه !! و بالذات بعد ما الكلام أنتشرانه الملك عايز يخليه رئيس وزراء.

وزير 1 : أنا عندي فكرة تساعدنا نخلص منه!!

وزير 2 : قول علطول!!

وزير 1 : أيه أكتر حاجة مميزة في دانيال... دايماً بيتكلم عنها!!

وزير 3 : إلهه إللي بيعبده!!

وزير 2 : أيوه دي فكرة حلوة.. ده معروف إنه ملتزم جداً بشريعة إلهه.

وزير 3 : حِلو يبقى ندور على حاجة هو بيعملها و ملتزم بيها و نوقعه فيها.

وزير 1 : أنا دايماً بشوفه فاتح شباكه، و بيصلي لإلهه و بيتعبد له.

وزير 2 : على فكرة ده بيعمل الحركة دي 3 مرات في اليوم، حتلاقيه راكع على ركبه وبيسجد لإلهه وبيصلي له.

وزير 3 : يبقى هي دي!!

وزير 2 : هي إيه بقى!!

وزير 1 : الحاجة إللي حنوقعه بيها...

وزير 2 : اشرح علشان أنا مش فاهم حاجة!!

وزير 1 : إحنا نروح للملك داريوس ونقنعه إنه يطلع مرسوم ، ومختوم باسمه، إنه محدش يطلب أي طلبة في المملكة غير من الملك شخصياً، لمده 30 يوم..

وزير 3 :ويكون أمر ملكي مشدد، و إللي ميلتزمش بالقرار ده ... يترمي في جُب الأسود.

وزير 2 : حلو أوي.. و نخلي الملك يمضيه باسمه علشان القرار ده ميتغيرش خااااالص، حتى الملك نفسه مش هيعرف يرجع في كلامه.

(أثناء الراوي ما بيتكلم يمثل الممثلون المشهد صامت).

الراوي : و فعلاً نفذ الوزراء والمرازبة خططتهم الشريرة ، و أقنعوا الملك إنه يمضي على القرار ده.. وبكده مكنش ينفع الملك يغير القرار ده، حتى لو قرر أنه يغير رأيه.

الراوي : أما دانيال فلما قرا المرسوم ده.. عمل حاجه غريبة جداً..

(يقف دانيال أمام الشباك و يفتحه).

دانيال : اشكرك يا إلهي لأنك معتني بيا...

الراوي : وسجد دانيال 3 مرات في اليوم، زي ما كان بيعمل في كل مرة كأن مفيش أي حاجة إتغيرت!!

و الوزراء يشاهدون دانيال.)

وزير 1 : أنا مش مصدق إللي أنا شايفه ده!!

وزير 2 : الراجل ده إيه... ما بيخافش!!

وزير 1 : جايب الشجاعة دي منين؟؟

وزير 3 : احسن!! خليه بقي يترمي في جُب الأسود!!

وزير 1 : طبعاً هو فاكر أنه علشان الملك بيحبه، حيكون عنده واسطة و مش حيموت.

وزير 2 : ده الملك نفسه مش هيعرف يغير قراره.

وزير 3 : طب بينا على الملك!!

(يدخلوا للملك).

وزير 1 : يا جلالة الملك داريوس! عيش للأبد!!

وزير 2 : هو مش جلالتك أمرت إن محدش يطلب من أي حد غيرك أي طلبة لمده 30 يوم

الملك داريوس : ايوه.

وزير 3 : طيب دانيال معملش أي اعتبار لجلالتك ده مسمعش كلامك.

وزير 1 : أيوه ده كأنك مأمرتش بأي حاجة.

وزير 3 : وشفناه و هو بيصلي لإلهه.

وزير 2 : مش مرة واحده جلالتك... لأ 3 مرات!! ده مُصر يكسر كلامك.

الملك داريوس : إيه الكلام ده !! سيبوني دلوقتي.

(يخرج الوزراء من عند الملك ويقفوا في نهايه المسرح يتفقوا مع بعض)

الملك داريوس : (بارتباك) أنا ارمي دانيال بنفسي في جُب الأسود !! إزاي الكلام ده!! انا حزين جداً ومتغاظ كمان ... دي مؤامرة عملوها الوزراء ضد دانيال و استغلوني علشان يخلصوا منه!!

تعمل ايه يا داريوس دلوقتي!! تنقذ دانيال إزاي؟؟

(يدخل الوزراء مرة أخرى للملك).

وزير 1 : في إيه جلالتك؟ القرار بتاع إلقاء دانيال في جُب الأسود لازم يتنفذ.

وزير 2 : شريعة الملك لايمكن تتغير... مش كده ولا إيه!!

الملك داريوس : (بحزن) هاتوا دانيال و اطرحوه في جُب الأسود!!

(يأتي الحارس بدانيال).

الملك داريوس : يا دانيال إلهك إللي بتعبده دايماً يمكن ينجيك من الأسود!!

(يأخذوا دانيال ويطرحوه في جُب الأسود) (موسيقى حزينه)

الراوي : والليلة دي كانت ليلة صعبة جداً علي الملك داريوس!!

مكنش له نِفس ياكل خالص، ولا يتكلم مع حد!! للدرجة انه النوم طار من عينيه.. وكل ده بسبب حُزنه على دانيال!! وتاني يوم في الفجر جري الملك على الجُب ونادى على دانيال!

الملك داريوس : يا دانيال.... هل إلهك إللي انتَ بتعبده دايماً قِدر ينجيك؟؟

دانيال : يا جلالة الملك عيش للأبد ... إلهي بعت ملاكه، و منع الأسود إنها تاكلني!! لأني برئ يا جلالة الملك قدام الله و معملتش أي ذنب قدامك!!

الملك داريوس : يا حراس طلعوا دانيال من الجب بسرعة، أما الوزراء إللي اشتكوا عليه جيبوهم هنا قدامي ، وارموهم في الجُب.

(يخرج دانيال و يأتي الحراس بالوزراء و يرموهم في الجُب وهم يصرخوا مع صوت أسود في الخلفية).

( ترنيمة دانيال).

أ/ سالي أنيس