مسرحية تفاعلية .. تعتمد في الاساس على حوار يوسف واسئلته للأطفال واجاباتهم بنعم أو لا من خلال رفع لافتات أحمر وفي ظهرها أخضر يتم توزيعها قبل عرض المسرحية
يدخل يوسف المسرح و هو لا يعلم من أين أتى.
يلتفت حواليه، ثم يبدأ في التحدث مع الأطفال.
يوسف : إزيكم...عاملين إيه؟
(ينتظر الأطفال ترد عليه)
يوسف : إنتوا عارفين أنا مين؟
(يسمع ردود الأطفال)
يوسف : أيوة أنا يوسف!! يوسف الشاب الجميل إللي كان عايش أحلى عيشه مع أبوه و أخواته، و فجأة حياتي تتقلب لما أخواتي يقرروا يتخلصوا مني ... تخيلوا!! أخواتي كانوا عايزين يقتلوني!! لولا رأوبين أقنعهم أنهم يرموني في البير، مكنتش حأبقي واقف معاكم هنا خالص...
(فجأة يسمع صوت من برة)
يوسف للأطفال : معلش حأسيبكم، أروح أشوف إللي ورايا، و أرجعلكم تاني.
(يخرج يوسف من القاعة خاص....ثم يعود بعد دقيقتين)
يوسف : أنا آسف جداً جداً أتأخرت عليكم ،بس كان عندي شغل، أصل بعد أخواتي رموني في البير،قعدت أتحايل عليهم انهم يطلعوني لكنهم مرضيوش ،أزعل ولا مأزعلش على إللي عملوه فيا ده؟؟
(يترك الأطفال ليختاروا اللون المناسب أحمر أو أخضر)
يوسف : فزعلت و أتضايقت و فوجئت أنهم بيطلعوني علشان يبيعوني للاسماعيلين!! و فجأة لقيت نفسي من أبن مبسوط و متدلع في بيت أبوه، لعبد و خدام بيتباع في أرض مصر و أشتراني رئيس شرطة فرعون، اسمه فوطيفار، و أديني شغال أهه.
أنا لازم أظبط الحاجات إللي هنا علشان فوطيفار حيجيب عفش جديد ولازم ننقل القديم ده!!
(يبدأ في نقل الأثاث على المنبر، ثم فجأة يجد صُرة فيها فضة)
يوسف : إيه ده...(يفتحها) كل دي فضة....دي كتير أوي...
تعمل بيها إيه يا يوسف مم تعمل بيها إيه؟ أنا مشفتش حد بيدور عليها!! (يتكلم للأطفال) إيه رأيكم؟ أخدها؟ و لا أديها لفوطيفار؟
ها أخدها؟؟ أديها لفوطيفار؟؟
لا أنا حأرجعها لصاحبها...دي مش بتاعتي!! و أنا لو خدتها أبقي أنا بخون الأمانة...
(يدخل فوطيفار من الباب الأمامي للمسرح بين الأطفال)
يجري عليه يوسف و ينحني أمامه.
يوسف : يا حضرة رئيس الشرطة فوطيفار!!
فوطيفار : نعم يا يوسف!!
(يوسفيعطيه الفضة)
يوسف : أنا لقيت صُرة الفضة دي وأنا بأرتب العفش!!
فوطيفار : (بتعجب) يااااه أنا بقالي شهــور بأدور عليها و مش لاقيها!! انتَ شاب أمين يا يوسف أنتَ ممكن تاخدها و أنا معرفش.
يوسف : مقدرش أخون الأمانة يا سيدي!!
فوطيفار : ليك عندي مكافأه كبيرة يا يوسف.
(في هذه اللحظة تدخل زوجته)
زوجة فوطيفار : مين سعيد الحظ إللي حتديله المكافأه الكبيرة!!
فوطيفار : (بفرح) أهلاً أهلاً بزوجتي العزيزة..
زوجة فوطيفار : حمداً لله على السلامة!! مقلتليش برضه مين إللي عايز تديله مكافأة..
فوطيفار : العبد الجديد إللي أشتريته من الاسماعيلين، طلع شاب أمين و لقالي صُرة الفضة إللي كانت ضايعة مني!!
زوجة فوطيفار : (تنظر ليوسف بإعجاب) برافو عليه...
(ثم تتحدث لفوطيفار) ياللا تعالى أنا قلت للخدم يجهزوا الغذا و الأكل في انتظارك.
(تخرج هي و فوطيفار من المسرح).
يوسف: أشكرك يا إلهي لأنك ساعدتني اسلك بأمانة، وخلتني أتصرف صح!!
لما أروح أشوف إللي ورايا...
(و يخرج يوسف من المسرح).
المشهد الثاني
(فوطيفار على المسرح)
فوطيفار : البيت أختلف خاااالص عن زمان.. شغلي زاد، وفلوسي زادت و البيت بقى مليان خير و كل ده حصل من بعد الخدام إللي اسمه يوسف ده جه البيت.. أنا أول مره اشوف عبد بالشطارة و الأمانة و الذكاء ده!!
(ينادي بصوت عالي يا يوسف).
(يدخل يوسف المسرح ويجري اليه)..
يوسف : (ينحني) نعم يا سيدي.
فوطيفار : أنا مبسوط منك أوي يا يوسف. مفيش مهمة اديتهالك، إلا و أنتَ نجحت فيها..بيتي شكله اتغير، كل حاجه بقت أحسن..
يوسف : ده شرف ليا اني اسمع الكلام ده منك يا سيدي.
فوطيفار : اسمع يا يوسف انتَ من هنا و رايح مسئول عن كل صغيرة وكبيرة في البيت. أنا مليش دعوة بأي حاجة في البيت ده..فاهم!!أي حاجة!!
يوسف : يعني ايه كلامك ده يا سيدي؟؟
فوطيفار : يعني أنا وكلتك على كل حاجة في البيت بتاعي.. أنتَ المسئول عن كل حاجة..أنا مليش دعوة غير بالأكل إللي حيتحط قدامي.. غير كده انتَ المسئول الأول في البيت.. أنا بأثق فيك يا يوسف.
يوسف : ده شرف كبير يا سيدي. و أنا حأكون قد المسئولية و الأمانة إللي انت وكلتني عليها.
(يخرج فوطيفار و يبقي يوسف).
يوسف للأطفال : انتو سمعتوا الكلام ده!! إنتو عارفين ده معناه إيه؟ أنا بقيت المسئول الأول في بيت فوطيفار..
أفرح ولا ما أفرحش من الخير ده؟
أفرح؟؟ ما أفرحش؟؟
يوسف : أكيد حأفرح ، بس في الأول لازم أشكر الله، لأنه لولا إنه معايا... أنا مكنتش شوفت النجاح ده.
أنا حأسيبكم دلوقتي لأننه بقى عندي مسئوليات كبيرة.
(يخرج يوسف و تدخل زوجة فوطيفار و تجلس علي الكرسي وهي تستخدم مروحة)...
(يدخل عليها فوطيفار)..
فوطيفار : زوجتي الجميلة بتعمل إيه؟
زوجة فوطيفار : أبداً ، قاعدة مرتاحة شوية... بعد شوية البنات حيجهزولي العطور... بس أنا كنت عايزة اسألك، إيه حكاية العبد إللي اسمه يوسف ده!!
فوطيفار : ماله يوسف؟
زوجة فوطيفار : أنا عرفت انك وكلت على البيت كله، و بقى مسئول عن كل صغيرة و كبيرة في اللي ليك. للدرجة دي انتَ واثق فيه؟
فوطيفار : أيوة ده شاب ناجح و أمين..أنا مش حلاقي حد ولا في شطارته ولا أمانته.
زوجة فوطيفار : هو فعلاً شاب كويس!!
معلش يا زوجي العزيز .. حأسيبك اشوف البنات عملوا إيه في العطور الجديدة بتاعتي.
فوطيفار : أنا كمان لازم أمشي عندي شغل..
زوجة فوطيفار : بس الميعاد أتأخر.
فوطيفار : عندي مشكلة كده محتاج اتابعها.. متقلقيش مش حتأخر عليكي.
زوجة فوطيفار : تمام... تحفظك الآلهه.
(يخرج فوطيفار و تبقي زوجة فوطيفار).
بعد ما تتأكد أنه خرج تنادي يوسف.
زوجة فوطيفار : يوسف يوسف!!
يوسف : نعم يا سيدتي..
زوجة فوطيفار : أخبار الشغل إيه..
يوسف : (وهو ينظر في الأرض) ماشي كويس النهاردة حنخلص نقل الحاجات إللي انتي أمرتي تنشال.
زوجة فوطيفار : (تنظر له بإعجاب) أنتَ شاب شاطر يا يوسف.
يوسف : شكراً ليكي يا سيدتي.
زوجة فوطيفار : فوطيفار مبسوط منك جداً... أنا عمري ما شفته واثق في عبد زيك كده.
يوسف : ده شرف كبير ليّ و أنا حأكون عند حسن ظنه.
زوجة فوطيفار : انتَ بتتعب كتير ..اقعد ارتاح شوية.
يوسف : حأرتاح في الغرفة بتاعتي بعد ما أخلص شغل.
زوجة فوطيفار : لأ أقعد دلوقتي!! تعالى جنبي هنا...
يوسف : العفو يا سيدتي..
زوجة فوطيفار : لأ بجد تعالى اقعد جنبي شوية و حكيلي عن حياتك إللي فاتت نشأتك ، تربيتك.
يوسف (للأطفال) : أول مرة اشوفها تتكلم معايا بالطريقة دي !!
مش عارف أعمل أيه؟ أقعد معاها ولا ما أقعدش ؟
أقعد؟ ما أقعدش؟؟
إنتوا شايفين فيها حاجه؟؟
فيها؟؟ مفيهاش؟؟
بس أنا مش مرتاح!!
(يلتفت إلى زوجة فوطيفار) : أنا بأشكرك على دعوتك يا سيدتي يس أنا عندي شغل كتير.. محتاج أخلصه قبل ما سيدي يرجع. عن إذنك!!
زوجة فوطيفار : ماشي يا يوسف... بس أنا مش حأسيبك.
(تخرج زوجة فوطيفار من المسرح)
الراوي : و تمر الأيام و اعجاب فوطيفار بيوسف بيزيد، و اعجاب زوجة فوطيفار بيوسف بيزيد برضه. بس زوجة فوطيفار كان ليها خطط تانية!!
(يوسف على المسرح يمسك ورقة و قلم ويحسب في حسابات)
(تدخل زوجة فوطيفار)
زوجة فوطيفار : يوسف!!
يوسف : (باحترام) نعم يا سيدتي!!
زوجة فوطيفار : ما بلاش كلمة يا سيدتي دي.
يوسف : (بتعجب) ازاي.. حضرتك ليكي احترامك.
زوجة فوطيفار : يوسف!! أنا معجبة بيك.
يوسف : (يرتبك) ميصحش!!
زوجة فوطيفار : (بغضب) في حد يكره أنه حد يحبه و يعجب بيه.
يوسف (للأطفال) : أعمل أيه؟ أول مرة من ساعة ما سبت بيت أبويا حد يقولي كلام حلو!!
أسمعلها ؟؟ و لا ما أسمعش؟؟
أسمع؟؟ ما أسمعش؟؟
بس لو سمعت لها .. ممكن مقدرش أوقفها تاني..
أنا مش حأقعد اسمع كلامها.
(يلتفت لزوجة فوطيفار): بعد أذنك يا سيدتي.. أنا عندي شغل كتير..
(ويخرج من المسرح ويتركها).
زوجة فوطيفار : كده يا يوسف..فاكر نفسك حتهرب مني.. حنشوف!!
(و تخرج من المسرح).
(يوسف يدخل المسرح ويتحدث للأطفال..)
يوسف : تصرفات زوجة فوطيفار بقت غريبة جداً... يوم عن يوم كلامها معايا كله إعجاب.. أنا لازم أخد بالي اديني دلوقتي رايح أحط لها الزرع اللي هي طلبتة..
(يمشي يوسف لآخر المسرح) و يجدها أمام المرآه.
يوسف : مساء الخير يا سيدتي.
زوجة فوطيفار : أهلاً يا يوسف ..أنا مستنياك من الصبح.
يوسف : إحم احم.. الزرعة إللي انتِ طلبتيها.
زوجة فوطيفار : سيبك من الزرعة.. يا يوسف أنا بحبك!!
يوسف : (بارتباك) إيه إللي حضرتك بتقوليه ده!!
زوجة فوطيفار : ايوه بحبك و مستعدة أعمل أي حاجه علشانك!!
يوسف ينظر للأطفال: أعمل ايه ؟؟ أسمع كلامها ؟؟ ولا ما أسمعش؟؟ أسمع؟؟ ما أسمعش؟؟ و فوطيفار و الأمانة إللي وكلني عليها.
يوسف لزوجة فوطيفار : الكلام اللي حضرتك بتقوليه ده مينفعش!!
زوجة فوطيفار : ليه مينفعش !! أحنا حنعيش مع بعض في السر، و فوطيفار مش حيعرف أي حاجة!! و حأديلك كل إللي نفسك فيه!!
يوسف للأطفال: أعمل ايه ؟؟ و أقولها ايه ؟؟ كلامها ممكن يكون شكله حلو.. لكن نتيجته حتكون إيه؟؟
أرفض عرضها ؟؟ ولا أقبل؟؟
لو رفضته حأبقى بأعصى أوامرها والحاجة دي ممكن تعمل مشاكل
ولو وافقت حأبقى بأخون الأمانة.. فوطيفار واثق فيا!!
يوسف لزوجة فوطيفار : الكلام إللي حضرتك بتقوليه ده مينفعش يا سيدتي.. إزاي أخون الأمانة اللي سيدي فوطيفار وكلني عليها؟؟ ده ميعرفش أي حاجة في البيت، واثق فيا و سلمني كل أموره ،أزاي أعمل الشر ده قدام الله و أخون فوطيفار معاكي!!
الزوجة : (بغضب) انتَ عارف انتَ بتقول ايه..انتَ بتعصى أوامري!!
يوسف : سامحيني .. مقدرش أعمل كده.. عن إذنك!!
(يخرج يوسف و تبقي الزوجة غاضبة).
الزوجة : (تتمشى على المسرح) كده يا يوسف.. انتَ فاكر نفسك مين علشان تقولي لأ.. طيب هو ممكن يكون خايف من فوطيفار أو خايف حد يشوفه!! برضه مش حاسيبك!!
(يدخل فوطيفار)
فوطيفار : مال زوجتي العزيزة شكلها متضايق!!
الزوجة : سيبني دلوقتي في حالي.
فوطيفار : مالك بس!!
الزوجة : مليش .. قرفانة من شغل البنات.. بوظولي العطور الجديدة بتاعتي.. و واحدة منهم قطعتلي الفستان الذهبي!!
فوطيفار : ولا يهمك يا حبيبتي.. أنا أجيبلك كل إللي نفسك فيه!!
الزوجة : خلاص.. سيبني دلوقتي أشوف حأتصرف إزاي.
(و تترك المسرح).
فوطيفار : أنا مش عارف دي مالها كده النهاردة!!
(يتركوا المسرح).
(يدخل يوسف و معه أحد الخدم).
يوسف : أعمل دي زي ما بقولك.. اطلع اشتري كل الحاجات دي.. و لو احتاجت فلوس أكتر أنا حأديك.
(يخرج الخادم) ويبقى يوسف، وتدخل زوجة فوطيفار.
الزوجة : يوسف...
يوسف : (ينظر للأولاد) ربنا يستر.
(يلتفت للزوجة) نعم يا سيدتي .
الزوجة : أنا بأحبك!!
يوسف : ميصحش الكلام ده...
الزوجة : متخافش مفيش حد في البيت. أنا أتأكدت اننا لوحدينا!!
يوسف : مينفعش.. و بعدين الله شايفنا وعارف احنا بنعمل أيه؟
الزوجة : ليه مينفعش... بأقولك تعالى معايا.. أنا بأحبك و بعدين ده أمر!! أنا بأمرك... ولو مسمعتش كلامي انتَ عارف أنا ممكن أعمل ايه؟
يلتفت يوسف للأطفال : أعمل ايه؟؟ دي بتهددني...اسمع كلامها ولا ما أسمعش!!
الزوجة : يوسف .. تعالى جنبي!!
يوسف : أعمل ايه..
الزوجة : (تمسك في ملابس يوسف) بأقولك تعالى معايا...
يوسف : سيبيني أنا مقدرش أعمل الشر ده و أغلط في ربنا !! سيبيني .. و يهرب (يخرج من القاعة).
الزوجة : (بغضب) انتَ اتجننت.. ماشي يا يوسف.
(تبدأ في الصراخ) الحقوني ..الحقووووني.......
(تدخل الخادمة لها)
الخادمة : مالك يا ستي .... مالك...
الزوجة : يوسف العبد إللي فوطيفار فرحان بيه ... حاول يتهجم عليا!!
(و تبدأ في البكاء).
(يدخل فوطيفار في هذه اللحظة...)
فوطيفار : في ايه... في ايه... مالك؟
الزوجة : يوسف إللي انتَ مبسوط بيه ، و بتقول عليه أمين!! و سلمته كل أمورك و مسئولياتك ... حاول يتهجم عليا.. ولما حاولت أوقفه و أقوله ميصحش و عيب ، و بدأت أصرخ خاف و هرب ، و آدي العباية بتاعته في إيدي..
فوطيفار : (بغضب) يووووووسف!!
(يدخل يوسف وهو مرتبك)
يوسف : نعم يا سيدي..
فوطيفار : إنتَ اتجننت.. تتهجم على زوجتي!!
يوسف : بس يا سيدي الكلام ده محصلش!!
الزوجة : (بغضب) يعني أنا كذابة... وهدومك إللي في ايدي دي.. إنتَ جبان و كذاب كمان!!
فوطيفار : مش عايز ولا كلمة يا يوسف... انا شكلي كده غلطت أكبر غلطة لما وثقت فيك.
يا حرااااس.. خدوا يوسف دهو أرموه في سجن فرعون.
يوسف : بس أنا برئ...برئ....معملتش حاجه.
(يجر الحراس يوسف و يأخذوه للسجن وهو يصرخ) برئ برئ...
الراوي : و مرت الأيام والسنين، وفضل يوسف أمين في علاقته مع الله ونجح في كل حاجه كان بيعملها حتى في السجن،
وجه اليوم إللي فسر فيه حلم فرعون، و أعجب بيه فرعون و أنبهر بحكمته و عينه تاني أعظم شخص في مصر...
(يدخل يوسف المسرح بالحُلة الملوكية).
يوسف : أزيكم .... فاكرني!!أنا يوسف ..بس المرة دي مش العبد إللي باعوه أخواته واشتغل في بيت فوطيفار.
أنا يوسف أعظم تاني شخص في مصر بعد فرعون نفسه.
عايز اقولكم أنا لو مكنتش هربت يوم ما اتعرض عليا الخطية و رفضت إني أزعل الله.. مكنتش حأبقي في المكانة دي دلوقتي، و ربنا يستخدمني إني أنقذ أهلي و شعب مصر من المجاعة العظيمة.
هروبي كان أحسن قرار أخدته في حياتي، حتى ولو في البداية إتسجنت مش كده؟؟
أ/سالي أنيس