فاصل موسيقي ...
المذيع: اصدقائي وصديقاتي اهلا بيكم معانا في حلقة جديدة من برنامجكم المفضل
" سؤال مفاجيء" ... انهاردة عندنا سؤال جديد جدا هنفاجيء بيه ضيوفنا
ونشوفهم هيجاوبوا يقولوا ايه ...
ها جاهزين نبدأ حلقتنا ؟ ... ياللا بينا
في البداية نحب نتعرف علی ضيوفنا إللي منورينا في الاستوديو وهنديهم فرصة
يعرفونا بنفسهم...
شادي : اهلا بحضرتك وبكل اصحابنا... انا اسمي شادي
جوي : انا اسمي جوي ومبسوطة اوي اني اكون معاكم انهاردة
المذيع: اهلا بيكم ... احب اعرف اصدقائنا ان ضيوفنا انهاردة اخوات وعايشين في
بيت واحد.
هاجاهزين للسؤال المفاجيء؟
شادي: ايوه طبعا ... انا عن نفسي دايما جاهز لاي حاجة وكل حاجة ...احم احم
بس مابحبش اتكلم عن نفسي كتير
جوي : ايوة اتفضل اسال
فاصل موسيقي ...
المذيع : طيب ... سؤالنا بيقول : "هتعمل ايه لو الرب يسوع جالك البيت زيارة
مفاجئة " ؟
شادي: لا لا لا ايه الاسئلة الصعبة دي .. متفقناش علی كده علی فكرة
جوي: ده سؤال جميل اوي
المذيع: نبدا بشادي بما انه قال انه جاهز لاي حاجة وكل حاجة ... ياللا يا شادي
اتفضل...
شادي : ايه ده ايه ده ! هو هيجي كده من غير ميعاد سابق ؟ طب يقول قبلها
عشان نجهز حالنا ونستعد ونبقی مجهزين حاجة حلوة نقدمهاله ...
المذيع : تستعد ؟ ايه يا شادي مش انت لسه قايل قدام كل اصحابنا انك دايما جاهز
ومستعد ؟
شادي : لا لا ده كلااااام انت بتصدق بسرعة كده ههههه
المذيع: وانتي يا جوي ؟
جوي : أنا عن نفسي جاهزة أقابله وعندي كلام كتير عايزة أقوله له.
المذيع : طيب قبل مانكمل مع أصدقائنا في الاستوديو هنخرج فاصل هنشوف
مراسلنا في جمعية خلاص النفوس في حلوان وهو بيعمل تقرير من الأولاد والبنات
هناك هيعملوا ايه لو الرب يسوع جالهم زيارة مفاجئة في بيتهم ...
فاصل موسيقي ...
)أحد الخدام يقف أمام الأولاد ويسالهم السؤال ويسمع اجاباتهم ... (
فاصل موسيقي ...
المذيع : ورجعنالكم تاني ... عايز أشكر مراسلنا على التقرير الحلو ده ... ونكمل مع
أصدقائنا في الاستوديو
ياللا يا شادي قولنا هتعمل ايه ؟
شادي: أول حاجة هاحتاج اعملها إني هادور على الكتاب المقدس بتاعي وانضفه
من التراب إللي عليه ... ياترى أنا اخر مرة حطيته فين .. مش فاكر
جوي : هتلاقيه في الدولاب بتاعك يا شادي ...
أنا مينفعش يعدي عليا يوم من غير ما اقرا في الكتاب المقدس واحفظ منه آية ...
عارف كمان أنا عندي سبورة حاطاها في الصالة باكتب عليها آية جديدة كل يوم
عشان بابا وماما يقروها ودايما بشاركهم بالحاجات إللي باتعلمها في مدارس الأحد .
المذيع : وإنت يا شادي مش بتعمل كده ليه ؟
شادي: ما أنا مش بافتكر أصلا أنا أخدت إيه في مدارس الأحد ... كل إللي بافتكره
الحاجة الحلوة إللي بأخدها كل اسبوع مولتو سامبا شيبسي ... كده يعني ههههه
المذيع : ده إللي بتفتكره بس ؟ طب وكلام ربنا إللي بتسمعه هناك في مدارس
الأحد ؟
شادي : عادي ما أنا بافتكرهم تاني لما جوي بتحكيهم تاني في البيت
المذيع : طيب إيه تاني هتعمله عشان تبقى جاهز للزيارة دي
شادي : افتكر إني محتاج أصلح علاقاتي مع بابا وماما وجوي ... أصل أنا كتير مش
باسمع كلامهم وكتير باتخانق مع جوي هاحازل ابطل اتخانق معاها لحسن يجي
يلاقيني في نص الخناقة يا خبررر ده أنا ساعتها هيبقى شكلي وحش أوووووي
المذيع : يا شادي بابا وماما يعرفوا أكتر منك وكل همهم مصلحتك وجوي بتحبك
بتتخانق معاها ليه ؟
شادي : مبحبهاش تلعب بلعبي ... أه باحبها و هي أختي وكده بس كله إلا لعبي
أصلا مابخليش حد من أصحابي يلعب بلعبي لحسن يكسرها .
المذيع : طيب يا جوي أحكيلنا على حاجة هتقوليها للرب يسوع أول ماتشوفيه ...
جوي: الحقيقة أنا عندي حاجات كنيرة عايزة أقولهاله...بس أول حاجة هاشكره إنه
حل مشكلة بابا لما مكنش لاقي شغل بس لما صلينا هو سمع صلاتنا وبعت لبابا
شغل ورجعنا فرحانين تاني.
المذيع : جميل أوي يا جوي إنكو صليتوا وربنا استجاب صلاتكم... طيب هاتقدميله
إيه لما يجي ؟
جوي: أنا زمان صليت وقدمت له قلبي عشان يسكن فيه ويكون هو الملك على
حياتي وكل يوم باقدم له تصرفاتي الحلوة مع بابا وماما وشادي وأصحابي كل ده
هدية له عشان يفرح بيها.
المذيع : هايل ده كلام جميل أوي يا جوي برافو عليكي.
للأسف وقت حلقتنا قرب يخلص بس قبل ماننهي الحلقة أنا عايز أقولكم على حاجة
مهمة أوي ...
الحقيقة إن الرب يسوع موجود بينا دايما مش هانستناه يجي زيارة لازم نكون
عارفين الكلام ده كويس...
شايف تصرفاتك ياترى بتعمل الحاجات إللي بتبسطه يا ترى بتقدم تصرفات حلوة كل
يوم تبين إنك إبنه أو بنته ... صلي دلوقتي وقول له يا رب من فضلك خليني أعيش
ليك وأعمل الحاجات إللي ترضيك وتفرح قلبك.
وبكده وصلنا لختام حلقتنا عايز أشكر شادي و جوي نورتونا أنهاردة واستنونا في
حلقة جديدة من برنامجكم " سؤال مفاجي " ... ربنا معاكم .
فاصل موسيقي ...
© www.madareselahad.org