مذكًرتي العزيزة:
وأخيرا أخدت الأجازة ... يا سلااااام إحساس رائع وشعور ميتوصفش إن الواحد يصحى براحته وينام براحته بالذات بعد وقت المذاكرة والإمتحانات.
بمناسبة الإمتحانات في موقف كده أحب أحكيهولك يا مذكًرتي العزيزة...
كنت باذاكر لإمتحان العلوم وفجأة حسيت كده أنه كل المعلومات دخلت في بعض ومبقتش عارفة تجربة الأكسجين من نمو النبات!!! فقلت لماما يا ريتني كنت عايشة أيام العهد القديم قالتلي إشمعنا يعني؟؟؟
قلتلها أصلي عمري ما قريت عن نوح بيذاكر علوم ولا يعقوب سقط في إمتحان رياضة ولا سارة كانت بتذاكر علشان المدرس عاملهم إمتحان شهر !
ضحكت ماما وقالتلي : مين قاللك الكلام ده يا مرمر ؟ ... مفيش حد يا حبيبتي في الدنيا دي مدخلش في إمتحان ... وقبل ماتعارضيني ... مش لازم يكون إمتحان في المدرسة... عندك إبراهيم مثلا ... الله إمتحنه وكان إمتحان صعب جداااا !!
بيني وبينك يا مذكًرتي العزيزة قعدت أفكر أفكر وقلت أنا سمعت حاجة شبه كده من الميس في مدارس الأحد ، فقلت لماما : قصدك يعني لما ربنا قالله قدم ابنك وحيدك إسحق إللي أنت بتحبه ذبيحة؟؟ ماما قالتلي صح يا مرمر وإبراهيم نجح ولا منجحش؟؟ قلتلها لأ نجح وكمان أخد الدرجة النهائية !!بس هو ذاكر إمتى؟؟ راحت ماما قالتلي إبراهيم كان دايما بيسمع لصوت الله ويعمل بكلامه ويصدقه ، كل ده كان تدريب ليه ومذاكرة كمان !
فكرت شوية وقلت لماما ... لاااا ده على كده إمتحان العلوم بتاعي أسهل بكتير من إمتحان إبراهيم ... ضحكت ماما وقالتلي يبقى تذاكري أحسن عشان تنجحي وتجيبي الدرجة النهائية زي إبراهيم كمان!
وذاكرت والحمد لله خلصت الإمتحانات وأنا دلوقتي في أجازة نص السنة .
إيه ده ... ده صوت ساندرا صحبتي ... ده أنا نسيت ... ده ميعاد النشاط إللي في مدارس الأحد جه ... أنا لازم أمشي دلوقتي باي بقى.
مرمر