الصحفي : برحب انهارده بضيف جديد معانا ونطلب منه يعرفنا على نفسه

مفيبوشث : أنا اسمي مفيبوشث  وبابا اسمه يوناثان وجدي اسمه شاول

الصحفي : ممكن تحكيلنا شويه عن باباك و جدك ؟

مفيبوشث : طبعا طبعا ... بابايا يوناثان كان من أعز أصدقاء داود ... وجدي شاول طبعا مشهور كان الملك قبل داود

الصحفي : احكيلنا شويه عن حياتك

مفيبوشث : أنا هبدأ معاك من أول ما كان عندي 5 سنين ... أول ما جالنا خبر هزيمة يوناثان وشاول جدي و موتهم خدتني المربية بتاعتي عشان نهرب وجريت بيا رحت وقعت ومن ساعتها وأنا أعرج من رجليا الاتنين

الصحفي : اكيد الموقف ده مش ممكن تنساه يا مفيبوشث ... يا ترى فيه مواقف تانيه تحب تحكيها

مفيبوشث : اه ده في موقف مهم جدا حصل في حياتي ومش ممكن انساه

في يوم من الايام قال الملك داود : هل لسه فيه حد من بيت شاول عشان اعمل معاه خير عشان خاطر يوناثان؟

وكان فيه خدام لبيت جدي شاول اسمه صيبا راحوا جابوه للملك داود ... راح صيبا قال للملك داود : اه لسه فيه ابن ليوناثان أعرج اسمه مفيبوشث

الصحفي : و بعدين عمل ايه الملك داود ؟

مفيبوشث : بعتلي ناس جابوني القصر بتاعه عشان كان عايزني

الصحفي : وكان ايه احساسك لما كنت رايح عايش تقابله؟

مفيبوشث : كنت خايف ليقتلني لان كان ده اللي بيحصل زمان أول ما ملك يموت كان الملك الجديد بيقتل كل أولاد وأقاريب الملك اللي قبله ... بس اللي حصل معايا كان غير كده خالص

الصحفي : احكيلنا ايه اللي حصل

مفيبوشث : أول ما دخلت اقابل الملك داود سجدت قدامه  والملك داود قاللي ماتخفش ... ده أنا هاعمل معاك خير عشان خاطر باباك يوناثان ... واكرمني كتييير كتيير خالص

الصحفي : أكرمك ازاي ؟

مفيبوشث : أول حاجة رجعلي كل حقول جدي شاول و الحاجه التانيه خلاني دايما أكل معاه في القصر بتاعه وعلى مائدته تالت حاجه وصًى صيبا و قاله أنك تشتغل أنت وأولادك و عبيدك كلهم في أراضي مفيبوشث عشان يكون فيه خير كتير لمفيبوشث.

وده كان بصراحة كرم كبير من الملك داود ليا وأنا مكنتش استحقه

الصحفي : أد ايه اتبسطنا بالحديث معاك يا مفيبوشث ... شكرا ليك

وفي نهاية حديثنا أحب أسيب معاكم حاجة : أنه ده كمان اللي ربنا بيعمله معانا ... بيقدملنا كل يوم خير ورحمة واحنا مانستحقش ... ياللا بينا نشكره

© www.madareselahad.org