نقوم بتجهيز صورة لهيكل عظمي على لوحة ورق أبيض أو ستيكر عاكس أصفر

و يتم لصق صورة الهيكل العظمي على ملابس شخص سوداء

 و صورة أخرى مكسوة بلون أحمر (ستيكر عاكس أحمر) يمثل اللحم على شخص آخر لابس أسود ... مثل الموجودة بصور الموضوع أسفل 

و يمكن اضافة صور لعظام بيضاء كثيرة متناثرة على عصا لعرضها قبل إظهار الهيكل العظمي

ملاحظات:
* يجب التأكد من أن قاعة العرض مظلمة و خلفية التمثيل سوداء و أي أدوات ثانوية يتم استخدامها يجب أن تكون سوداء
* يجب التأكد من عدم وجود ملابس بيضاء أو ملونة في العرض لأنها ستظهر و تشتت المنظر المقصود
* يتم استخدام لمبات مسرح أسود (بنفسجية - ألترا فيوليت) لتظهر الرسومات المطلوبة
* ممكن شراء أفرخ أو لوحات الستيكر العاكس من مكتبات الفجالة أو المكتبات الكبيرة
* اللمبات البنفسجية يتم شرائها من العتبة أو من متخصصي إضاءات المسرح الأسود
* يتم ظهور الرسومات حسب ذكرها في التعليق أو السرد القصصي 

توضع ستارة سوداء تغطي منتصف المسرح  ( غير الستارة التي بالخلفية ) يمكن للأشخاص الاختباء خلفها والظهور في حينه
يقص المدرس القصة ( تضاء لمبة المسرح الاسود )
كان حزقيال نبي لشعب الله وقت ما كان الشعب مسبي في بابل .. وللأسف الشعب كان عايش في الشر  وبيختار اختيارات غلط مع ان الرب كان محذرهم انهم هيتحملوا نتيجة اختياراتهم الغلط .. وعلشان هما كانوا فاكرين ان  موضوع السبي ده مش هيطوّل فضلوا عايشين في خطاياهم .. واختياراتهم الغلط 
وإتنبأ حزقيال بأن الخطية زي حمل تقييييييل بيشدهم لتحت وبرضه بيختاروا الخطية وعايشين فيها ... تعالوا نطفي النور و نشوف كمان النبؤة  التانية الراااائعة واللي جات في اصحاح 37 من سفر حزقيال
إتنبأ حزقيال انه ماشي في وادي مليان عظام كتييييرة اوي و ناشفة جدا ومغطية سطح الارض ( يظهر من خلف الستارة عظام يد - رجل - جمجمة )
وقال الرب لحزقيال تفتكر ممكن العظام دي تحيا تاني ؟ قال حزقيال يارب انت اللي تعرف 
قال ربنا لحزقيال اتنبأ علي العظام دي وقلها اسمعي كلمة الرب وانا احييكي واكسيكي بالاعصاب واللحم
وفي وسط ما حزقيال بيتنبأ حصل زلزلة عظيمة واتجمعت العظام على بعضها
( يخرج الهيكل العظمي من وراء الستارة كاملاً ويقف دون حراك )
وابتدي فعلا يتكسي أعصاب ولحم 
( يخرج الهيكل المكسي لحم من خلف الستار ليقف بظهره مختفيا امام الهيكل العظمي ثم يستدير فيظهر في نفس الوقت يستدير الهيكل العظمي ليعطي ظهره ويختفي)
لكن برضه ماكنش فيها حركة ولا حياة .. قال ربنا لحزقيال اتنبأ عليها انها تكون فيها روح .. ولما اتبأ حزقيال عليها اتحركت ( يتحرك الشكل حركة جندي بالجيش - المارش العسكري) وكل عظام الوادي اتجمعت واتكست ودخل فيها الروح وبقت جيش الكتاب بيقول انه جيش عظيم جدا جدا 
يستدير الشكل ويدخل خلف الستارة السوداء وكذلك الهيكل العظمي
يطفئ كشاف المسرح الاسود .. يضاء نور القاعة
تعليق بعد الاسكتش
حتي لو وصلت حالتنا اننا بقينا زي الميتين في خطيتنا .. ومافيش فايدة في اننا نقوم تاني ونتخلص من خطيتنا .. الرب بيقول لنا النهاردة مع حزقيال انا اقدر ارجعكم عايشين واقفين علي رجليكم اقوياء واعمل منكم جيش عظيم قوي واحوّل قلبكم من قلب صخري لقلب لحم مليان  بروحي ..  الروح القدس

**نشاط جماعي : يمكن الاشتراك مع الأطفال في عمل هيكل عظمي بالصلصال مثل صورة 3 الموجودة في صور الموضوع

**شغل يدوي : خاص بنفس القصة هنا 

www.madareselahad.org©