مذكرتي العزيزة كل سنة و انتي طيبة...مش علشان النهاردة عيد ميلادك..متفهمنيش غلط!! هو صحيح انتي عيد ميلادك امتي؟؟
أنا فاكرة تقريبا اول مرة اكتب فيكي كان من 10 سنين كدة تقريبا،. أنتي عجزتي علي فكرة هاهاهاهاهه..انا كبرت طبعا مش بقيت في إعدادي!
يووووه برضة طلعت من الموضوع الاساسي...مش عارفة أمتى هاغير العادة دي!! و بالمناسبة تغيير العادات الوحشة أو اللي مش بتساعد الواحد انه يبقي انسان كويس دي حاجة مهمة جدا و مش سهلة و محتاجة تدريب...زيها زي الصيام بالظبط!
و ده يرجعني لبداية كلامي معاكي..كل سنة وانتي طيبة بمناسبة الصيام الكبير!!
انتي عارفة السنة دي انا اول مرة اصوم ؟؟ أحكيلك ايه اللي شجعني..
الوقت اللي فات حصلتلي كذا مشكلة في المدرسة بسبب نرفزتي و اني مش بأعرف أتحكم في كلامي لما أغضب..طبعا إنتي مش من متخيلة المشاكل اللي دخلت فيها..اتخانقت مع رانيا لأنها اتأخرت في تسليم مشروع العربي اللي كنا بنجهزله في المدرسة و انا كنت خلصت الجزء بتاعي وهي اتأخرت في الجزء بتاعها و الميس نقصتني في الدرجة النهائية بسببها..رحت اتخانقت معاها و قطعتلها ورقها!!! أنا لحد دلوقتي مش عارفة أنا عملت كدة أزاي! !!
طبعا هي مسكتتش و راحت اشتكتني للميس!! الميس نادتني و زعقتلي طبعا! مش هتصدقي انا عملت ايه ..تخيلي اني قلت للميس إنتي السبب في المشكلة لأنك خليتيني اشتغل مع رانيا !!! مش عايزة أقولك رد فعل ميس إخلاص كان ايه؟؟؟ خدتي بالحضن و ادتني وردة بمناسبة عيد الحب!!
بأهزر طبعا..هي خدتني بس علي المديرة و ما اديتنيش وردة..أخدت جواب استدعاء ولي أمر للمدرسة!
مفيش بقي داعي اقولك ماما عملت ايه و انا جايبالها جواب من المدرسة هدية عيد الحب!
رحت مدارس الأحد الأسبوع دة و انا متضايقة جدا و بعد ما خلصت مدارس الأحد نادتني ميس تريزا سألتني عن اللي مضايقني...حكيتلها اللي حصل و قلتلها انا نفسي أبطل العصبية دي. لقيتها بتسألني جربتي يا مرمر تصومي قبل كدة؟؟ قلتلها لأ.
قالتلي انتي عارفة انه الصيام دة حاجة مهمة جدا جدا في حياتنا مع الرب يسوع. قلتلها اصوم علشان الرب يسوع يحبني اكتر؟؟ قالتلي لأ طبعا الله هو أبونا و محبته لينا مجانا و من غير مقابل..و هو مش مستني صيامنا علشان يغفر لنا خطايانا! الرب يسوع مات علي الصليب و غفر جميع خطايانا. ..كل اللي علينا أننا نطلب منه يسكن في قلبنا و يغفر لنا خطايانا..الأية بتقول"إن أعترفنا بخطايانا فهو أمين و عادل حتي يغفر لنا خطايانا و يطهرنا من كل إثم"
سألت ميس تريزا آمال هأصوم ليه؟؟ قالتلي لما بنصوم بنبطل ناكل الحاجات اللي بنحبها و نضيع وقتنا في حاجات كتيرة و بنركز اكتر علي علاقتنا بالرب يسوع.
بنزود وقت قرايتنا للكتاب المقدس و بنروح الكنيسة و نزود وقت صلاتنا..كل الحاجات دي بتعمق علاقتنا بالرب يسوع.
قلتلها ماشي يا ميس بس دة ماله بالمشكلة اللي عندي؟؟ قالتلي ايه اكتر حاجة بتحبي تاكليها؟؟قلتلها معروفة طبعا الشيكولاتة! ! قالتلي مفيش شيكولاتة يا ست مرمر في الصيام! !قلتلها ازاي؟؟مش هأقدر!!! قالتلي دي فايدة الصيام بندرب نفسنا أننا نبطل حاجات متعودين نعملها..زي النرفزة بتاعتك محتاجة تدريب..خدي وقت الصيام دة فرصة تدربي نفسك انك متتسرعيش في النرفزة. الموضوع دة مش سهل في الأول لكن مع الوقت هتلاقي نفسك بتغيير.
بصراحة يا مذكرتي اقتنعت بكلامها لكن مقدرتش أبطل تفكير في الشيكولاتة. .دة أنا بموت فيها!! بس رجعت قلت الحمد لله اني ممكن اشرب بيبسي في الصيام الكبير. تقولي الميس كانت بتقرا أفكاري. .لقيتها بتقوللي مرمر انا عارفة أنك تقريبا بتحبي البيبسي و بتشربيه كل يوم وانا كنت بقولك انه الحاجة دي مش صحية!!!
كنت عايزة أقولها من فضلك يا ميس متكملييييييييش!!! يعني لا شيكولاتة ولا بيبسي. ..كدة كتير!!
بس لقيتني بقولها فهمت يا ميس في وقت الصيام دة هأدرب نفسي اني ابطل البيبسي كمان!! الميس فرحت بيا قوي و قالتلي أنها هتصليلي و هتابعني.
أنا فعلا بشكر ربنا من أجل ميس تريزا!! هتسأليني يا مذكرتي انا عاملة إيه في الصيام؟ هأقولك الموضوع مش سهل بس كل يوم عن التاني بأحس اني مبسوطة أكتر و بقي وقت صلاة أكتر و الحاجة دي فارقة معايا...حتي ماما حاسة أني متغيرة .
انا هأسيبك دلوقتي علشان و رايا واجب لسة معملتوش. ..سلام يا صاحبتي.
مرمر