هنطلع ٢ من المخدومين وهنسأل الاولاد والبنات ايه الكلام السلبي اللي ممكن تسمعه عن نفسك في البيت أو المدرسة أو الشارع أو من الأصحاب؟ هيبدأوا يقولوا : شكلك وحش - انت غبي - مش بتفهم - بارد - فاشل - مالكش لزمة وهنكتب كل كلمة منهم على ورقتين صغيرين ونبدأ نلزق الورق على ال ٢ مخدومين اللي طلعناهم قدام الولاد الأولى هتفضل تقرا الكلام وتصدقه وتفضل تقول أنا فعلا كده وهافضل كده وهما عندهم حق وتقعد في ركن وتفضل تعيط التانية هتقرا الكلام كله ولكن هيكون ليها رد فعل مختلف.. هتاخد كتابها المقدس وتبدأ تقرا فيه هتسمع صوت من الخلفية ( حد من الخدام ) يبدأ يرد على كل كلمة مكتوبة. انتي بنتي غالية عليا.. انتي مش وحشة بالعكس ده انا خلقتك على صورتي ومثالي انتي مش باردة بالعكس انتي بتعرفي ازاي تتحكمي في ردود افعالك ومش بتتعصبي انتي مش مالكيش لازمة ده انتي ليكي دور ودور مهم أنا خالقك عشانه اقعدي قدامي عشان تعرفيه وهكذااااا وفي الآخر البنت هتصلي وتشكر ربنا انه شايفها جميلة وانها مش هتصدق أي كلام سلبي يتقال عليها الآية : "إِذْ صِرْتَ عَزِيزًا فِي عَيْنَيَّ مُكَرَّمًا، وَأَنَا قَدْ أَحْبَبْتُكَ." اش ٤٣ : ٤