الصحفي : بنرحب بيكم مشاهدينا الأعزاء في حلقة جديدة من برنامجنا ومعانا إنهاردة ضيف جديد وهو ضيف متميز جداً و له مواقف كتير هيحكلنا عليها ...
خلينا في البداية نتعرف عليه.
بطرس : أنا اسمي سمعان ... ولما اتقابلت مع الرب يسوع اداني اسم تاني "صفا" اللي تفسيره بطرس ... بس ممكن تندهلي باسم بطرس
الصحفي : مبسوطين تكون معانا انهاردة يابطرس ... احكيلنا شويه عن نفسك
بطرس : أنا رجل بسيط كنت باشتغل صياد سمك وليا أخ اسمه أندراوس وهو اللي قاللي على الرب يسوع .
الصحفي : كنت بتشتغل صياد ؟ معنى كده انك اشتغلت حاجة تانية غير شغلانة الصيد؟
بطرس : أيوه ... في الأول كنت باشتغل صياد بعد كده بقيت تلميذ للرب يسوع وبقيت بامشي معاه دايما.
الصحفي : قوللنا إزاي بقيت تلميذ للرب يسوع؟
بطرس : أقولكم ... بعد معجزة صيد السمك الكتير اللي الرب يسوع عملها معانا الرب يسوع قاللي انت من دلوقتي هتكون صياد للناس ... ومن ساعتها وأنا سبت
الشبكة وسبت كل حاجة ومشيت مع يسوع
الصحفي : رائع يا بطرس قرار جميل ... ويا ترى كنت قريب للرب يسوع ؟
بطرس : أنا و يعقوب و يوحنا كنا أقرب التلاميذ للرب يسوع ... شوفناه على جبل
التجلي و دخلنا معاه وهو بيقوم ابنة يايرس ... حضرنا معاه أغلب معجزاته .
ده كمان الرب يسوع عمل معجزة جوه بيتي
الصحفي : جوه بيتك ؟ ممكن تحكيهلنا
بطرس : أكيد طبعاً ممكن ... حماتي كانت عيانة كان عندها حمّى والرب يسوع شفاها وفي مرة تاني خلاني أمشي على المياه.
الصحفي :ياه يا بطرس ... ده انت حضرت مواقف جميلة أوي مع الرب يسوع يا بختك ...
بطرس : أنا لو قعدت احكيلكم على اللي حضرته وشوفته قدامي من معجزات والتعاليم إللي سمعتها من الرب يسوع هاحتاج وقت كتير أووووي
الصحفي : طيب يا بطرس خلينا نتكلم شوية عن أحداث صلب وقيامة الرب
يسوع ... كنت موجود وقتها مش كده ؟
بطرس : هابتدي معاك من العشاء الأخير ... في اليوم ده الرب يسوع اجتمع معانا احنا التلاميذ عشان نأكل الفصح وبدأ يحكي معانا عن صلبه وقيامته وقاللنا كمان
إنه فيه واحد منا هيسلمه و إننا كلنا هنشك فيه في الليلة دي و ...
الصحفي : هاه كمل ايه اللي حصل ؟
بطرس : رحت أنا قلت للرب يسوع لو كل الناس شكت فيك أنا مش ممكن أشك فيك ... لقيت الرب يسوع بيقولي أنت يا بطرس في الليلة دي وقبل صياح الديك
هتنكرني 3 مرات
الصحفي : وحصل آده ؟
بطرس : للأسف حصل ودي من أكتر المواقف إللي ندمت فيها وبكيت بعدها بكاء شديد
الصحفي : وإيه اللي حصل وقت القبض على الرب يسوع ... ممكن تحكلنا شويه
بطرس : في الليلة دي الرب يسوع راح بستان جثيماني عشان يصلي وأخدني أنا ويعقوب ويوحنا معاه وطلب مننا أننا نسهر معاه بس احنا مقدرناش نسهر ونمنا
وجه صحانا مرتين و في المرة التالتة جه قالنا قوموا الوقت جه !
الصحفي : وقت إيه ... أنا مش فاهم !
بطرس : وقت القبض على الرب يسوع ... وفجأة لقينا ناس كتير جاية علينا ويهوذا كان معاهم ... وسلم على الرب يسوع و باسه وكان دي العلامة اللي كان يهوذا متفق عليها معاهم بعدها علطول قبضوا على يسوع
الصحفي : وإنتوا كان إيه موقفكم ؟؟؟
بطرس : أنا لأني كنت باحب الرب يسوع ومش عايزهم ياخدوه أول ماشفت كده بسرعة طلعت سيفى و ضربت بيه عبد رئيس الكهنة وقطعت أذنه
الصحفي : ياااااه ده انت شجاع جداً علشان حاولت تدافع عن الرب يسوع
بطرس : للأسف أنا كنت فاهم غلط زيك آده
الصحفي : ليه ؟ .... إيه الغلط فى كده ؟
بطرس : الرب يسوع قاللى ان اللى عملته ده مش صح وقاللى ارجع سيفى مكانه وان كل اللى بيلجأ للسيف , بالسيف يهلك ... ومش بس كدة ده كمان شفى أذن
الراجل ده
الصحفي : ياااااه حتى وهما جايين يقبضوا عليه كان لسه بيعمل خير .. أد إيه الرب يسوع محب... قدم محبة حتى لأعدائه ... طب وبعد كدة حصل إيه ؟
بطرس: بعد كده أخدوا الرب يسوع للمحاكمة والصليب
الصحفي : أكيد انت فضلت ورا الرب يسوع وما سيبتوش لحظة واحدة
بطرس: لأ أنا للأسف كنت خايف ياخدونى معاه .... بس فضلت أتابع من بعيد اللى بيحصل
الصحفي : وبعد ما الرب مات على الصليب عملت إيه انت وباقى التلاميذ ؟
بطرس: حسينا وقتها أن كل أمل عندنا ضاع ومش بس كده كنا خايفين اليهود يعملوا فينا حاجة زى ما عملوا فى الرب يسوع , فاتجمعنا فى علية كلنا مع بعض
وكنا بنقفل علينا كل الأبواب
الصحفي : وفضلتوا على كده لحد امتى ؟
بطرس: لغاية يوم الأحد لقينا المريمات جايين وقت الفجر وبيقوللنا أن الرب يسوع قام , أنا ما صدقتش .... وقلت أروح بنفسى أشوف .... وفعلاً رحت القبر
ولقيت الأكفان موجودة لكن جسد الرب يسوع مش موجود
الصحفي : وبعدين إيه حصل تانى ؟
بطرس: فى نفس اليوم بالليل واحنا قاعدين فى العلية وقافلين علينا الأبواب لقينا الرب ظهر فى وسطينا وقاللنا سلام لكم وورانا ايديه وجنبه , ووقتها فرحنا جدااا
الصحفي : طبعاً ليكم حق تفرحوا ... أنا مش عارف أقولك إيه على الوقت إللي حكينا فيه معاك ... شرفتنا انهارده
بطرس : أشكرك على الوقت الجميل ده ... ربنا معاكم
الصحفي : في أخر برنامجنا أحب أشكر كل المشاهدين ... استنونا في حلقة جديدة ... سلااااام
© www.madareselahad.org