الرئيسية » منوعات » ركن عيد الأم

اسكتش: باقدر تعبك

768

الشخصيات: رامي - ماما – رانيا - الدكتور

 

يظهر رامي على المسرح يشاهد التليفزيون

 

ماما(صوت فقط) : يا رامي يا رامي قوم يا بني شوف إللي وراك كفاية فرجة على التليفزيون .

 

رامي: ياللا يا للا حلوة كمل قدام شوط ... جووووووووووووووون

 

ماما : أنا كام مرة أقول قوم شوف مذاكرتك هو مفيش سماع للكلمة أبدا؟؟؟    

 

رامي: يوووووه بقى هو كل شويه مذاكرة مذاكرة أنا زهقت

( وينزلوا من على المسرح)

 

رامي (لنفسه) : ذاكر ذاكر ذاكر أوووف

 

رانيا : مالك بس يا رامي زعلان ليه؟     

 

رامي: يا رانيا أنا زهقت ... هو إحنا مش ورانا حاجة غير المذاكرة؟؟؟

 

رانيا : أنا كمان زهقت بس مالهاش حل يعني ... ماهو ده دورنا ولازم نقوم بيه

 

رامي: أنا حاسس إننا اتخلقنا عشان نذاكر ونمتحن وبس ... إمتى بقى الواحد يكبر ويشتغل وميبقاش وراه ولا مذاكرة ولا أرف

 

رانيا : بس تفتكر الشغل مش متعب يعني؟؟؟

 

رامي( بسخرية): متعب إيه يا بنتي ؟؟؟ مانتي شايفة ماما اهي بتتعب في إيه يعني؟؟؟!!  يااااااه لو أخد دورها وهيا تاخد دوري !!!

 

رانيا : طب بس بقى كفايانا كلام خلينا نشوف إللي ورانا عشان مامامتجيش وتزعقلنا.

 

رامي ( يمسك الكتاب ) : حاضر يا ست رانيا ... نظرية أرشميدس تنص على .....

 

يسمعوا صوت جامد وصوت مامتهم بتنادي

 

ماما : إلحقوني يا ولاد إلحقوني

 

رانيا : إيه ده دي ماما!!

 

رامي: إيه يا ماما مالك إيه اللي حصل ؟؟؟؟؟

 

ماما : كنت واقفة على الكرسي وباجيب حاجة من فوق رحت وقعت.

 

رانيا : طب حاولي تتسندي علينا وتقومي. ( يخرجوا بيها للمسرح)

 

رامي : رانيا أنا هاروح أجيب دكتور يجي يشوف رجلها

 

رانيا : بسرعة يا رامي

 

رامي : إتفضل يا دكتور

 

الدكتور: مالك يا ستي ... ألف سلامة ... وريني رجلك كده

          امممم واضح إنه تمزق في الأربطة ... حاولي متحمليش عليها والمسكن ده كل 12 ساعة ... وألف سلامة عليكي

 

ماما : الله يسلمك يا دكتور

 

رامي: شكرا يا دكتور ... شرفت ( وينزل مع الدكتور)

 

ماما: اسنديني يا رانيا لازم أقوم أشوف الحاجات اللي ورايا في المطبخ لحسن المطبخ مقلوب يا بنتي.

 

رانيا : مطبخ إيه بس يا ماما إنتي مش سامعة الدكتور قال إيه؟

 

رامي: متقلقيش يا ماما أنا ورانيا هنعمل كل حاجة بس إنتي إرتاحي

 

رانيا: يا للا يا رامي تعال معايا ... إلى المطبـــــــــخ!!!

 

رامي : بصي يا رانيا أنا هانزل أشتري كل اللي إنتوا عايزينه قبل ما بابا يجي عشان تلحقي تعمليه ... وحاولي تروقي البيت شويه

 

رانيا : أوك يا رامي

 

وبعد فترة

 

رانيا: إتفضلي يا ست ماما دوقي عمل إيديا

 

ماما : معلش يا ولاد أنا تعبتكم أوي إنهاردة ... ربنا يخليكوا ليا

 

رامي: وإحنا عملنا إيه يعني يا ماما ... ربنا يخليكي لينا وتقومي بالسلامة

 

رانيا: ماما عايزه حاجة تاني قبل مانروح نذاكر

 

ماما : شكرا يا حبايبي ... أنا هادخل أنام شوية

(ويسندوها وينزلوها من على المسرح)

 

رامي: ياااااااه يا رانيا اليوم إنهاردة كان مرهق أوي

 

رانيا : فعلا يا رامي ... شفت بقى إنك كنت غلطان لما قلت إن ماما مش بتتعب ... أديك جربت وشفت بنفسك ... إيه رأيك بقى؟؟؟

 

رامي: أيوه صح يا رانيا أنا كنت غلطان لما قلت كده ومكنتش مقدر تعبها ... ومن هنا ورايح أنا لازم أساعدها في شغل البيت و أكرمها زي ماالكتاب المقدس بيعلمنا :           إكرم أباك وأمك لكي تطول أيامك على الأرض .

 

رانيا : برافو عليك يا رامي ... أنت كده اتعلمت الدرس تماااااااام

 

 

 

© www.madareselahad.org

 

 

مرفقات للتحميل