أفكار للمساعدة
يمكن عمل البرص بأي كريم بشرة ويمسحه نعمان في اخر مرة يغطس فيه والنهرملاية لونها لبني توضع على ترابيزة ويعمل فيها ثنيات كأنها موجة
الشخصيات
زوجة نعمان - نعمان - البنت - حارس ملك اسرائيل - ملك اسرائيل - أليشع - خدام أليشع - حارس نعمان - الراوي
الراوي: زمان يا اولاد أيام الأنبياء كان فيه نبي في مملكة اسرائيل عاش في بلد اسمها السامرة وكان النبي ده اسمه أليشع.
لكن في نفس الوقت كان فيه ملك تاني على بلد اسمها أرام وكان جيشه قوي .
كان عنده رئيس جيش عظيم اسمه نعمان تعالوا نعرف حكايته.
( يدخل نعمان وزوجته)
زوجة نعمان: مالك يانعمان شكلك متضايق !
نعمان: مفيش !!
الزوجة: لأ فيه ... ده انت قائد عظيم وجبار بأس ... إنت ناسي إنه بسببك الجيش بتاعنا كسب معارك كتيرة؟
نعمان: لأ مش ناسي ... بس أنا كمان أبرص... مش شايفه؟؟
الزوجة: طيب متضايقش نفسك ، ادخل نام شويه وانت اعصابك تهدا
( يذهب نعمان وتدخل الفتاه المسبية)
الفتاة: عايزه مني أي حاجة تانيه ياستي ؟ أنا خلصت كل اللي حضرتك طلبتيه مني !
الزوجة: شكرا مش عايزه حاجة
الفتاة: بس شكل حضرتك زعلان ... فيه حاجة مضيقاكي؟
الزوجة: اديكي شايفه جوزي قائد قوي وبينتصر في معارك كتيره بس للأسف الفرحة مش كاملة بسبب برصه
الفتاة: طب ممكن أقول لحضرتك على حاجة؟
الزوجة: قولي
الفتاة: يا ريت سيدي نعمان يروح للنبي اللي في السامرة ده اكيد يقدر يشفيه من برصه
الزوجة: فعلا؟؟؟
الفتاة: أيوة يا ستي مانا من شعب إسرائيل
الزوجة : طب لما ادخل أقول لنعمان
( وتذهب الزوجة والفتاة )
الراوي: وفعلا يااولاد قالت لنعمان كل الكلام اللي البنت الصغيرة اللي كانت أسيرة وجابها نعمان عنده ، ونعمان صدق كلامها وراح قال للملك بتاعه فقام ملك ارام وبعت جواب لملك اسرائيل ومعاه دهب وفضة كتير وهدوم غالية ... وتعالوا نشوف إيه اللي حصل...
( يجلس ملك اسرائيل ويدخل اليه الحارس بالجواب)
الحارس: الجواب ده من ملك أرام يا جلالة الملك !
الملك: وريني كده ....( يقف الملك ويمزق ثيابه)
يعني إيه الكلام ده ؟؟؟؟ ملك أرام باعت يقوللي أنا بعتلك نعمان عبدي عشان أشفيه من برصه.... هو أنا الله عشان أشفي وأقوّم .... اشهدوا ده بيتلككلي عشان يحاربني!!!
( وينزل الملك والحارس.... ويطلع أليشع والخدام أثناء كلام الراوي)
الراوي: ولما سمع النبي أليشع باللي حصل بعت لملك اسرائيل وقاله ليه قطعت هدومك ابعتهولي عشان يعرف إنه فيه نبي في اسرائيل.... وفعلا راح نعمان لأليشع ...تعالوا نعرف ايه اللي حصل
( يظهر نعمان مع الحارس بتاعه)
خدام أليشع : ياسيدي في قائد بره اسمه نعمان جاي يقابل حضرتك.
أليشع: روح قولله إنه ينزل 7 مرات في نهر الأردن فيروح البرص منه
خادم أليشع لنعمان: النبي أليشع بيقولك روح نهر الاردن وانزل فيه سبع مرات حتخف ويروح البرص منك
نعمان ( بغضب) : يعني ايه الكلام ده !!!
ده انا قلت انه هيخرجلي ويحط ايد مكان البرص ويصلي لإلهه فأخف مش أروح نهر الأردن ... مافي أنهار كتيره في دمشق احسن من نهر الأردن كنت نزلت فيها وخلاص... مش رايح حته أنا هارجع بلدي
حارس نعمان: يا سيدي اسمع ... مش لو كان النبي طلب منك أمر أصعب كنت هتنفذه ، مابالك بقى بأمر بسيط زي ده مجرد انك تنزل في النهر
نعمان: ماشي لما أشوف
( يذهبوا إلي النهر وينزل نعمان سبع مرات وحارسه يستره بملاية)
نعمان : إيه ده انا مش مصدق نفسي ... مش مصدق نفسي... أنا خفيت .. أنا لازم أرجع تاني للنبي أليشع عشان أشكره
( ويذهب هو وحارسه للنبي أليشع)
نعمان : أنا دلوقتي بس عرفت إنه فيه إله حي في اسرائيل ومفيش أي ألهه تانيه على الأرض من فضلك اقبل وخد الهدية دي مني .
أليشع: ابدا !!
نعمان: ده انت اللي ساعدتني عشان خاطري اقبل وخد الهدية البسيطة دي مني
أليشع : أنا مش هاخد منك أي حاجة ... متحاولش معايا
نعمان: أنا من هنا ورايح مش هاعبد غير الله الحي إله اسرائيل ... سلام يا راجل الله.
© www.madareselahad.org