الصحفي : أهلا بيكم يا كل أصدقائي وصديقاتي ... انهاردة عندنا حلقة خاصة جدًا بمناسبة الكريسماس ... وهنستضيف كمان شخصية خاصة جدًا كلنا بنحبها وهو علامة مميزة للكريسماس... معانا انهاردة سانتا كلوز... أهلا بيك يا سانتا
سانتا كلوز: أهلا بيك وبكل أصدقائي وصديقاتي ... ماري كريسماس.
الصحفي : ماري كريسماس يا سانتا ... أنت طلعت شخصية حقيقية ... اناكنت فاكر غير كده !
سانتا كلوز : هههههه أيوة أنا شخصية حقيقية وكتير من الناس زيك كده كانوا فاكرين إني أسطورة ومش حقيقي.
الصحفي :أنا مش عارف اندهلك بإيه ... سانتا كلوز ولا بابا نويل ؟
سانتا كلوز :بص أنا اسمي الأصلي نيكولاس وجه منها اسم كلوز و كلمة سانتا يعني قديس يبقى اسمي سانتا كلوز يعني القديس نيكولاس ... أما بقي بابا نويل ف دي جات من كلمة بالفرنساوي اسمها papa noel يعني أب الميلاد والمقصود بيها طبعا عيد ميلاد الرب يسوع لأني كنت باجيب هدايا أيام عيد الميلاد .
الصحفي : تمام كده أنا فهمت ... ممكن بقى تحكيلنا حكايتك ؟
سانتا كلوز : آه ممكن طبعًا... أنا اتولدت في حتة اسمها ميرا موجودة في بلد كان زمان اسمها ليسيا .
الصحفي : ودي فين دلوقتي؟
سانتا كلوز : دي موجودة دلوقتي في تركيا
الصحفي : تمام ... احكيلنا شوية عن عيلتك...
سانتا كلوز : بابا وماما كانوا أغنيا أوي و عندهم فلوس كتير .. و ماكانش عندهم ولاد خالص .. فضلوا يصلوا لحد لما ربنا اداهم ولد إللي هو أنا... وراحوا السما وأنا عندي 16 سنة.
الصحفي :و عملت ايه بعد ما بقيت لوحدك يا سانتا ؟
سانتا كلوز: قررت إني أبعد عن ميرا البلد إللي كنت عايش فيها عشان أبقى قسيس يعني أبونا في كنيسة أو راهب وفعلا عملت كده لكن بعدها بمدة طويلة الأسقف بتاع ميرا راح السما، فربنا اختارني عشان أكون أسقف بداله.
الصحفي : ياااااه ده انت قضيت كل حياتك في خدمة ربنا.
سانتا كلوز : أيوة أنا باحب ربنا جدًا وباحب أخدمه جدًا جدًا.
الصحفي : رائع ... طب ممكن أسأل سؤال ؟؟؟ إيه حكاية اللون الأحمر إللي أنت دايمًا بتلبسه؟
سانتا كلوز: أقولك ... زمان كان الأسقف بيلبس عباية لونها أحمر. و من هنا بقى لبسي لونه أحمر
الصحفي : آآآآه فهمت ... طب وشنطة الهدايا إللي على ضهرك دي رايح بيها فين؟
سانتا كلوز: أنا متعود إنه قرب عيد ميلاد الرب يسوع (الكريسماس ) ألف على البيوت وأوزع هدايا على الولاد و البنات وهما نايمين.. أصلي أنا باحبهم أوي.
الصحفي :ياه يا سانتا ده إنت شخصية حلوة أوي ... بجد إحنا مبسوطين إننا اتقابلنا معاك انهاردة.
سانتا كلوز: أنا كمان اتبسطت بوجودي معاكوا ... بس أنا لازم أمشي دلوقتي عشان أروح أوزع الهدايا ... ياللا أقولكم سلام وماري كريسماس.
الصحفي : سلام يا سانتا.
أصدقائي وصديقاتي سانتا كلوز بيحب ربنا قوي و كان من كترما بيحبه كان بيجيب هدايا يديها للولاد والبنات عشان يفرحهم بعيد ميلاد يسوع.
و انت يا ترى فكرت و فكرتي هتحتفل بعيد ميلاد يسوع إزاي؟
وبكده نكون وصلنا لنهاية حلقتنا إنهاردة مبسوطين إننا كنا معاكم وكل سنة وإنتم طيبين ... سلااااام
© www.madareselahad.org