الأبطال: بيبو – مشمش (خروف كبير ) – فلفل (خروف صغير ) – جون
بيبو : ازيك يا جون ... هو إيه إللي بيحصل هنا وإيه كل الترانيم دي ؟
جون: إحنا بنرنم ترانيم الكريسماس ... الترانيم إللي بتحكي عن إزاي الله
بعت لينا ابنه واتولد في أرضنا ... إحنا عايزين نشكر ربنا على محبته.
بيبو : يعني معنى كلامك إن كل الناس دي تعرف عن محبة ربنا ليهم ؟
جون: أتمنى يكونوا عارفين ده ... إحنا كنا لسه بنقرا في الكتاب المقدس
إزاي ربنا بين محبته لينا إنه بعت ابنه لينا في الكريسماس .
بيبو: وإيه تاني هيحصل إنهاردة؟
جون: هنتقابل مع 2 ضيوف مميزين جداً ( مشمش وفلفل) ... اقعد واسمع
هما بيحكوا على إيه
بيبو : أوك يا جون هارجعلك تاني ( يخرج بيبو )
---------------------------------------------------------------------------------
فلفل : إزيك يا مشمش
مشمش: إزيك يا فلفل
فلفل : إيه موضوع نظارة الشمس إللي لابسها دي يا مشمش؟
مشمش: دي عشان تحمي عنينا من النور الجامد
فلفل : بس إحنا بالليل يا مشمش ومفيش نور جامد ولا حاجة
مشمش: آه بس ممكن يكون فيه
فلفل: لا مش هيكون فيه ... مش هيكون فيه شمس في الست ساعات
دول
مشمش: بس كان فيه قبل كده نور جامد جداً وده كان في الليل
فلفل:فعلا؟ إمتى ده ؟
مشمش: من سنين فاتت كان فيه مجموعة مننا مع الرعاة بتوعنا هنا في
الحقول وكانت الدنيا ضلمة أوي ... وفجأة فيه نور نوّر جامد قدام
عنينا
فلفل: وده كان إيه ؟
مشمش: كان ملاك ... والرعاة بتوعنا كانوا خايفين أوي ومكنوش عارفين
إيه إللي بيحصل
فلفل : قصدك ملاك من السما ؟؟؟ مرسل من عند الله ؟؟
مشمش: أيوة بالظبط ... قال للرعاة ماتخافوش أنا جاي أقول لكم على
أخبار حلوة ... فيه طفل مميز جدًا اتولد
فلفل : أنا عمري ما سمعت عن ملاك يجي عشان يعلن عن ميلاد حد
مشمش: الطفل ده كان ابن الله ... اتولد عشان يخلص العالم كله
وبعدين السما كلها اتملت ملايكة وكانوا بيسبحوا الله ... كانوا
منورين أوي أنا مكنتش قادر أبصلهم ... كنت أتمنى يكون معايا
نضارة شمس وقتها .
فلفل : طب والرعاة عملوا إيه بعد كده ؟
مشمش: بعد ما الملايكة مشيوا الرعاة راحوا عشان يشوفوا الطفل،
الملاك كان قاللهم إنهم هيلاقوه في مزود ... وبعد شوية رجعوا
وكانوا مبسوطين أوي وكانوا بيقولوا لكل الناس إنهم شافوا
الطفل يسوع
فلفل: ودي طبعاً كانت ليلة رائعة بالنسبة لك
مشمش: طبعـــــاً
فلفل: بس ده كان من وقت طويل أوي ... إنت ليه لسه لابس نضارة
الشمس لحد دلوقتي؟
مشمش: عشان أنا عارف إن يسوع هيجي مرة تاني ... بس المرة دي
مش هيجي كطفل لكن هيجي ملك عظيم
فلفل : وااااو وتفتكر هيكون زي كده !
مشمش: إذا كان الدنيا نورت جامد لما جه كطفل أمال هتنور أد إيه لما
هيجي في مجده السماوي... وهما قالوا لازم نكون مستعدين
لمجيئه.
فلفل: أوك الأفضل أجيب أنا كمان نضارة شمس ... ياللا أشوفك بعدين يا
مشمش
مشمش: سلام يافلفل
---------------------------------------------------------------------------------
بيبو : هاي يا جون ... أنا مبسوط إني لقيت النضارة الشمس بتاعتي ...
وبكدة أكون جاهز لمجيء الرب يسوع التاني
جون: يا بيبو إنت عارف إن الخرفان ساذجة ومش بتفهم ... إنت مش
محتاج لنضارة شمس عشان تكون جاهز لمجيء يسوع
بيبو: (مرتبك – يشيل النضارة ) مش محتاج نضارة ؟؟؟ أمال إزاي أكون
جاهز لمجيء الرب يسوع ؟
جون: بإنك تكون صديقه ... إنك تصدقه وتعمل إللي بيقول عليه ...
الموضوع مش موضوع لبس
بيبو: أنا مبسوط إننا لغينا فكرة النضارة دي أنا برضه كنت شايف إنه هيكون
سخيف لبس نضارة شمس بالليل
إيه رأيك تيجي نرنم ترانيم الكريسماس ؟
جون: أوك يا بيبو ياللا نعمل كده
مترجم من : www.max7.org©
بواسطة : www.madareselahad.org